Sent
Sent es manzunà la prüma jada in ün documaint dal 930 cul nom "Vicus Sindes". Plü tard cumparan eir las fuormas "Sindes", "Sinde", "Sinnes", "Syns" e "Sins". I nu dà ingünas infuormaziuns sgüras davart la fuormaziun dal cumün dürant il temp antic. Cler esa be cha Sent d'eira dal 1400 circa uschè grond sco hoz. L'on 1572 manzuna l'istoriograf Chiampell cha Sent saja ün cumün considerabel cun passa 300 chasas e circa 1'000 abitants. Sent d'eira dimena dasper Scuol il plü grond cumün ed es restà quai fin dal 1900. Il purtret dal cumün da Sent s'ha müdà dürant ils ultims tschientiners pervi da guerras ed incendis. L'on 1499, la dumengia da las Palmas, ha ün'armada austriaca dat fö e devastà tuot ils cumüns d’Engiadina Bassa. Dal 1596 sun arsas 26 chasas, in avuost dal 1748 24 chasas ed als 23 october 1823 73 abitaziuns cun tablats e stallas e tuot la racolta. Dal 1911 sun arsas 5 chasas dal quartier dad Archas Sot. Be üna da quellas es gnüda refabrichada bler plü tard. Pro l'ultim incendi dals 8 gün 1921 sun arsas 45 chasas. La structura da la populaziun s'ha müdada impustüt eir sco consequenza dal svilup illa pauraria. Famiglias grondas toccan pro'l passà. La populaziun da Sent s'ha diminuida tanter il 1920 e'l 1970. Dal 1970 vivaivan 700 persunas in nos cumün, hoz sun quai s-chars 900.
La refuorma (1576) ha influenzà la vita da la baselgia dürant blers decennis. Hoz sun ca. 80% da la populaziun refuormats e 20% catolics o d'otras religiuns. Nossa baselgia es gnüda fabrichada dal 1496. Da tuot las trais baselgias chi existivan üna jada es be amo mantgnüda la ruina da San Peder al vest dal cumün. Il clucher neogotic da nossa baselgia San Lurench rimplazza daspö il 1898 quel clucherin roman chi derivaiva dal temp intuorn il 1250.
Las fracziuns Sur En a l'entrada da la Val d'Uina, Crusch a l'otezza da la via chantunala e Sinestra, sco eir il bains d'Uina e da Zuort in vals lateralas vers süd e nord, toccan pro'l cumün da Sent. Da Sur En, situà al süd da l'En, as riva tras la Val d'Uina fin a Schlingia aint il Vnuost.
Plü bod d'eira Sur En la zona industriala dal cumün. Cun l'ütilisaziun da la forza d'aua da la val d'Uina gnivan miss in funcziun muglins, resgias, tendscharias e chalcheras. Hoz sun Sur En, Sinestra e Zuort puncts da partenza e böts da bleras gitas inschmanchablas.
Albert Schocher 
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.