Fotograf Gian Battista Gross, Tschierv (1883-1961)

Gian Battista Gross es nat als 31 da marz 1883 a Cuoira, ingio ch'el passainta eir seis temp da scoula e da giuventüna. Al tecnicum a Burgdorf ha el terminà ün stüdi sco tecnicist da construcziun. Davo il stüdi ha'l lavurà vi da la construcziun da la lingia da l'Alvra a Bever. Sco commember dal stab da fabrica ha'l fat là eir servezzan militar dürant la prüma guerra mundiala. Davo ha'l lavurà pel proget naziunal da triangulaziun sco geometer in Bregaglia, in Engiadina ed in Surselva. Davo la seguonda guerra mundiala es el i a Tschierv in Val Müstair, ingio ch'el ha fat diversas lavurs. El es stat impiegà da l'ovra electrica, chaschier da la chascha d'amalats, funcziunari dal register funsil e planisader. Daspera d'eira Gian Battista Gross ün apicultur paschiunà e fotograf. El es mort ils 27 da december 1961. Gian Battista Gross ha imprais a cugnuoscher la fotografia dürant la scoula chantunala. Probabelmaing ha el imprais a fotografar illa butia da fotografias Lienhard e Salzborn, per la quala el ha fat registraziuns da cuntrada. La fotografia es dvantada üna paschiun chi til ha accumpagnà dürant tuot sia vita.

La famiglia ha surdat il relasch a l'archiv dal stadi. Quel es gnü digitalisà ed es uossa accessibel online [staatsarchiv-findsystem.gr.ch/...].

Il relasch fotografic cuntegna d'üna vart registraziuns da la cuntrada, pustüt da Tschierv, da tuot la Val Müstair e da l'Engiadina. I da eir üna vasta collecziun da registraziuns da persunas: famiglia ed amias da la Val Müstair, purtrets d’homens, da duonnas e d'uffants, registraziuns da gruppas. Finalmaing registraziuns chi documenteschan la vita da minchadi in Val Müstair: l'agricultura e la silvicultura, las festas, las radunanzas ed occurrenzas, il temp liber ed il trafic, ma eir il servezzan activ dürant la prüma guerra mundiala o accidaints da trafic.