Sur - Alp Flex - Hotel Piz Platta istorgia (1.1)
Sur - Alp Flex - Hotel Piz Platta istorgia (1.1)
Igl maletg mossa da veir igl Hotel Piz Platta, digl mang soura, vista cunter süd-west.
Igl onn 1908 ò igl indigen Gion Grisch, tgi era emigro an Frantscha e turno all’antschatta digl 20avel tschentaner a Sour, biagia igl Hotel Piz Platta sen l’Alp Flex. El era architect ed o biagia a Furnatsch la tgesa cun la tor, anc oz actuala.
Ansemmen cun Caspar Badrutt digl Hotel Palace da Son Murezzen vevan els l’intenziun da biagier sen Flex en Centrum da Sport, gl’era en taimp tgi na cursavan anc nigns autos. Per rivar sen Flex vevan els l’intenziun da biagier davent digl plang digls Mulegns (oz magasings digl militer) ena funiculara sen Flex. Or divers muteivs è chella intensiun betg neida realisada. Gion Grisch ò alloura biagia sez sainza sustign ester igl sies Hotel Piz Platta a Flex.
Gion Grisch leva er promover la «cuschigna franzosa» uscheia veva el produtgia igl caschilign «Alp Flex, Grisons, Double Creme ». Gion è mort igl onn 1918. Sia feglia Moscha Cabalzar-Grisch ò surpiglia igl Hotel e mano tal anfignen ca. 1925. La feglia da Moscha ò mano anavant igl Hotel anfignen igl onn 1935 ed alloura igl vandia agls conjugals Hans e Katharina Andrist-Guler da Klosters GR.
Igl onn 1937 è igl Hotel davanto unfrenda d’en barschamaint tras igl tgamegn ed è uscheia nia destruia da radagn. Hans Andrist (1897-1983) e Katharina Andrist-Guler (1902-1975) on biagia se igl Hotel da nov, pero an cunstrucziun da lagn e crap ord la regiun. Igl 1937 ò igl nov Hotel Piz Platta avert sies portas.
Igl Hotel è nia an diversas etappas da construcziun angrondania e moderniso. Anfignen igl onn 1985 è tal, tgi era an possess dalla famiglia Andrist, nia affito.
Igl onn 1985 compra Hans-Peter Brunner, en passiuno currider da cursa lunga, igl Hotel cun l’intenziun da promover l’Alp Flex scu centrum da cursa lunga. Chegl era er igl taimp cura tgi igl ancunaschaint currider Andi Grünenfelder tranava sen l’Alp Flex.
Igl 1989 è igl Hotel ia tras compra agls conjugals Rolf e Helga Poetsch tgi vevan l’intenziun da passantar cò sia pensiun. Gl`ò lia esser oter, Rolf à mort e la vieva Helga o cun grond angaschamaint mano anavant igl travagl anfignen igl onn 2000 cura tgi, siva d’ena gronda renovaziun, igl Hotel è nia surpiglia dalla Flix AG.
(indicaziuns Jacques Dieterle 15.12.2000)
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.