La scoula privata catolica a Valchava
La scoula privata catolica a Valchava
Dal 1895 ha inoltrà il cussagl ecclesiastic da Müstair trais dumondas a la radunanza cumünala da Sta. Maria.
1. Füss il cumün pront da far pass pro l’inspectorat da scoula e pro’l cussagl d’educaziun per chi vegna concess d’introdüer üna scoula privata a Valchava ? «La radunanza as declaret cuntainta».
2. Füss ün pront d’impedir als uffants catolics chi abitan in cumün da frequentar la scoula a Sta. Maria ? «Ün decidet d’imprometter da far nos possibel da tegner quels scolers davent da nossa scola, però da non ils sforzar quetant, perche cha in ultim cas gnissan in conflict cun la ledscha scolastica dal chantun.»
3. Füss ün pront da dar legna a gratis i’l god, però cha tuot la lavur gniss fatta a caric da la scoula catolica? «Ün decidet da dar circa 8-10 Raummeters legna però be uschè lönch cha almain 10 infants catolics
da nos cumün frequaintessan la scoula da Valchava, que voul dir scoula privata.»
Dal 1896 es la chasa da la scoula privata gnüda fabrichada. Ils uffants esters o catolics dals duos terzals d’aint han frequentà da là davent la scoula privata catolica a Valchava. Lingua d’instrucziun d’eira il tudais-ch.
Ün dals prüms magisters da la scoula catolica a Valchava es stat Hilarius Simonet. Davo han instrui eir muongias e l’ultim fin dal 1948 magister Sigisbert Tuor.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.