A la fin dal 19avel tschientiner es gnüda fundada la scoula reala Val Müstair cun sez a Sta. Maria. L’intent da quista scoula d’eira da spordscher a buns scolars da las ultimas classas ün’instrucziun chi tils permettaiva da frequentar plü tard üna scoula media o d’absolver ün giarsunadi cun scoula professiunala.

Ils genituors da quists scolars vaivan da pajar üna contribuziun annuala da fr. 30. Per uffants da famiglias povras d’eira pussibel da redüer quista taxa. Plü tard pajaiva mincha scolar fr. 50. Per blers d’eira quai ün magara grond import e gniva cr itichà cun radschun sco schicana pac sociala.

Sta. Maria delegiaiva duos commembers aint cussagl da scoula e tschels cumüns minchün ün. Ün dals prüms magisters da la scoula reala da vallada es stat Georg Zinsli da San Murezzan. El ha instrui quia dal 1901 fin al 1920 ed es stat divers ons eir actuar cumünal. Seis protocols sun manats tuots in lingua e scrittüra tudais-cha. Ils prüms ons han frequentà be scolars da Sta. Maria e Valchava quista scoula e plü tard lura eir da tschels cumüns da la Val.

Il prüm scolar da Müstair es stat dal 1902 Rudolf Ruinatscha e l’ultim dal 1918 Felix Murk. Da las glistas da scolars resulta cha eir uffants nan d’Engiadina e dafatta ün aint da Tuer han fat ils duos ultims ons da scoula a Sta. Maria.