Arrivada d'ina bara sil plaz Cadruvi a Sedrun. Davostier la casa da scola baghegiada ils onns 1880. Avon la casa da scola il local da pumpiers. Dretg da quella il Sontget dils mats, eregius 1864 e svanius ils onns 1960 muort la construcziun dalla via. Enamiez la foto el funs la resgia dils Solivas. Seniester dalla scola il prau dalla pervenda, il Dulezi!

Ord igl urbari da 1838: Moda da satrar ina bara gronda

Pils morts da Sedrun e Gonda va il segnerfarrer entochen en casa dil defunct, dat l'absoluziun suenter il ritual e cumpogna la bara da leu naven entochen en baselgia. Pils da Salins entochen la Platta u Pun sur Gonda che va sur igl ual via, l'aua dils mulins, e buca pli lunsch. Ils morts d'auters vitgs vegnan tschentai giu sin Cadruvi, nua ch'il segnerfarrer ed ils auters spirituals retscheivan la bara sco avon ei detg e cumpognan da leu naven entochen en baselgia, nua ch'ei vegn fatg las funeralias suenter il solit e silsuenter satrau mintgin en ses logs tier ses perdavons.