Chesta tgesa agl stradung cantunal a Savognin, era da chel taimp ca. anturn igls onns 1938-47 abitada dalla famiglia Remigius Peterelli - Zündel. Remi Peterelli manava lò ed an madem mument er an la stalla viglia, da tgavals digl otel Piz Mitgel an vaschinansa, anc oz existenta, sia garascha per reparar automobils. Ainten chella garascha, vasibla sen la foto, veva el aint sies amprem camiung. Dasperas ainten la tgesa manava sia Donna Alice, nata Zündel, sia amprema scola da musica. Igl onn 1949 ò Ezio Peduzzi-Savoldelli cumpro la tgesa e biagia tala da nov. Ia ma ragord anc tgi Ezio Peduzzi manava davent las miraglias viglias cun igl tgaval ed igl tgar da troccla. La troccla niva numnada igl indrezs tg'ins matteva sen igl tgar da freia per manar ni trer tera. Trax na davigl betg da chel taimp tar nous. Igl bietg nov, òz existent, dalla mazzlareia Peduzzi veva malagea e biagia per gronda part Peder Uffer, impressari, barmeir. La planta sen la foto è anc oz existenta.