Tarasp Sparsels cul chastè. Intuorn l’on 1040 es gnü construi il chastè dals signurs da Tarasp, oriunds dal lai da Como. L’on 1239 es la fortezza ida als cunts dal Tirol e dal 1464 es dvantà il chastè ün cuntadi austriac. Aint il 16avel tschientiner es gnü amplifichà l’implant ed es dvantà fortezza da cunfin. Dal 1803, cun Napoleon, es il chastè da Tarasp, dvantà part da la Republica Helvetica, sco üna da las ultimas enclavas svizzras. I’l prossems decennis ha müdà il chastè plüssas jadas possessur ed es i in malura. La stà dal 1900 ha l’industrial da Dresden, Dr. Karl August Lingner, fat la cura a Vulpera. L’inventur d’Odol ha lura decis da cumprar la fortezza falombra. Per renovar il chastè ha’l ramassà stüvas e mobiglia or da chasas nöblas dal Grischun, dal Tirol, e dalla Germania. Dal 1916 ha Lingner installà aint illa anteriura chombra d’armas ün orgel da la firma Jehmlich da Dresden chi es hoz il plü grond orgel privat da l’Europa.

Dal 1916 es mort Lingner inaspettadamaing. El vaiva fat sü il chastè al ultim rai da la Saxonia, Friedrich August III. Cun quai cha quel nun ha acceptà l’erta es i il chastè al grond duca Ernst Ludwig von Hessen. La famiglia von Hessen es statta possessura fin als 30 da marz 2016 cur cha Not Vital ha cumprà il chastè da Tarasp. Hoz cuntegna Tarasp üna collecziun dad art antica, moderna e contemporana.