Per commemorar igls 100 onns siva la mort digl grond artist Giovanni Segantini ò la posta svizra emess ena marca postala an la valeta da 1.80 (francatura per ena brev posta aerea) cun igl maletg "Mezde sur las alps" tgi è nia stgaffia a Savognin igl 1891. La donna tgi tgira las nursas è sies model preferia Baba Uffer da Savognin. Giovanni Segantini ò vivia a Savognin ansemen cun sia famiglia digl 1886 anfignen igl 1894 e stgaffia cò ena buna part digls sies pi ancunaschaints maletgs. An connex cun chell'emissiun è er nia stgaffia ena cuverta speziala cun igl bol da Savognin digls 24.9.1999. Ansemen cun la Pro Segantini, l'uniun turistica e la posta Savognin è la populaziun neida anvidada da neir segl plaz da posta e commemorar chel evenimaint cun ena pitschna fiera.

Sot igl raport dalla Pagina da Surmeir vusainsa ena collascha da Giovanni Netzer cun igls pi ancunaschaints maletgs da Segantini.