Cunvenziun cun la societad dalla „Blechmusic“ da Tujetsch

Fatga ils 18 da mars 1883 denter la ludeivla vischnaunca da Tujetsch e la societad dalla Blechmusic, era da Tujetsch.

Sin la instanza fatga sut sura datum da part dalla societad dalla Blechmusic da Tujetsch tier la vischnaunca per in subsidi, applicabel per l’amortisaziun dil capital da 430 frs., che la societad ha fatg si entras la procura da 7 instruments musicals sin via da cumpra, ha la vischnaunca concludiu da dar alla sura societad sin d’atun proxim, aber senza tscheins 180 frs., sco desiderau subsidi e quei sut sequentas cundiziuns:

1mo. Ils instruments dalla sura societad deigien cul di dad oz esser tuts exclusiva proprietad dalla vischnaunca da Tujetsch.

2do. Aschigleiti sco la allegada societad ei sesminuida en commembers, da maniera che quella sa buca producir la musica publicamein ed igl ei cheu avon maun neginas novas forzas per quella cumpletar e reorganisar cun qualificai persunals, deigien tuts 7 instruments cun era las musicalias che quella societad posseda, vegnir surdai senza negina bonificaziun ulteriura alla suprastonza da Tujetsch, la quala ha lura quels instruments musicals e musicalias da guvernar e conservar sco proprietad dalla vischnaunca per aschiditg ch’ei leva e s’organisescha lura puspei ina nova societad da musica.

3tio. Aschiditg sco la sura societad musicala exista, deigien ils menziunai instruments esser en cumpleina disposiziun da quella, quei ei per diever ed intent dalla musica, la quala ha da prestar ses survetschs sils dis da nossas fiastas ecclesiasticas senza honorars encunter.

4to. Deigi la societad era haver il cumplein dretg da remplazzar libramein sperditas da commembers extrai ord la societad conform beinmanegiar da quella entras qualificai persunals.

5to. Eis ei tschentau da part dalla vischnaunca alla societad la cundiziun, che quella astgi sut negins tetels prestar lur survetschs musicals sin e tier bals ni en ni ord vischnaunca.

Il sura attestan

Tujetsch, ils 19 da mars 1883 En num dalla vischnaunca

Soliva Johann Anton

Per la societad dalla musica, ils presents commembers da quella sezza

Carl Caveng

Joseph Antoni Biart

Adolf Caveng

Duri Batesta Huonder

Wigieli Josepf Wenzin

Rest Valentin Beer

Thomas Berther