Chasper Stupan - nov directur RTR
Chasper Stupan - nov directur RTR
Chasper Stupan (*1941 - †2012) daventa 1984 il nov directur da Radio e Televisiun Svizra Rumantscha RTR. El è il successur da Clemens Pally e resta directur 17 onns fin l'onn 2001.
En ina intervista televisiva dat Chasper Stupan pled e fatg davart sia visiun per Radio e Televisiun Rumantscha.
Biografia
Naschì è Chasper Stupan sco vischin d’Ardez ils 17 d’avust 1941 a St. Maria en Val Müstair. Sia uffanza e giuventetgna ha el passentà a S-chanf ed a Segl Maria. L’Engiadin’Ota, questa vasta regiun da rara bellezza, ha furmà il giuven Chasper da maniera che questa furmaziun ha tegnì tut sia vita: ina tenuta liberala sco princip da vita, chapientscha per ils auters, avert per dumondas da svilup tecnic ed economic, affecziun per il turissem ed anc dapli per il sport e na d’emblidar: il puter. Quest idiom tgirava Chasper Stupan sco la poppa da ses egls.
1962 finescha el il seminari da scolasts a Cuira e surprenda ina plazza sco magister a San Murezzan. 15 onns instruescha el là e sa participescha a la vita publica dal vitg e da la regiun. In temp era sco suppleant da la Partida liberaldemocratica en il cussegl grond. Spezialmain s’engascha el dentant en organisaziuns da sport, fa il pledader sin plazzas da sport ed arriva uschia er en il mund da las medias cun commentar sin DRS 1 ils gieus da hockey dal HCD. E quests commentaris, en ses dialect aleman marcant e persunal, daventan legendars.
1977 tscherna la CRR (Cuminanza rumantscha da radio e televisiun) Chasper Stupan sco «collavuratur da program da las emissiuns rumantschas a Cuira». Da quest temp cumpeteva la tscherna dal persunal a la societad purtadra da radio e televisiun. Stefan Sonder presidiava la CRR e mintga tscherna era bunamain in act statal. Il post da programs da las emissiuns rumantschas era administrativamain ed ierarchicamain ina filiala da Radio DRS a Basilea e quai che pertutgava las emissiuns da televisiun da SF DRS a Turitg. Clemens Pally timunava il post cun ses pitschen team en il bajetg nov a la via dal teater 1 a Cuira.
1983 tscherna la medema CRR, questa giada sut il presidi da Fidel Caviezel, Chasper Stupan sco manader dal post da programs. El entra en uffizi 1984 cun il titel d’in schef da partiziun ed ha da dar pled e fatg a Cuira a la CRR, a Basilea al directur da radio Andreas Blum ed a Turitg a quel da la televisiun Ulrich Kündig, suenter Peter Schellenberg. Betg ina simpla constellaziun per manar il post cun ses 23 collavuraturs e collavuraturas!
Chasper Stupan senta che betg dumondas instituziunalas èn ussa d’impurtanza, era sche questas domineschan la CRR. El vesa ed auda che la SRG SSR è en cumplain svilup. En Svizra romanda, anc dapli en Svizra taliana ed er en Svizra tudestga expandescha la SRG SSR. Novs studios vegnan construids, novas emissiuns realisadas, il svilup tecnic pussibilitescha da distribuir ils programs. Leon Schlumpf, 1984 president da la confederaziun, «regala» als Rumantschs la segunda chadaina UUC per il Grischun. Las emissiuns rumantschas da radio pon ussa vegnir emessas sur questa chadaina e betg marginalmain en il program da radio da DRS 1 e 2. Er il Radio Rumantsch cumenza ad expander: 1984 vegn l’emissiun «Allegra» introducida. Duas uras emissiun d’accumpagnament! Tge di da festa che quai è stà cura che l’ emprim «Allegra» è vegnì emess – live!
Il clima en Svizra è favuraivel. Rumantschas e Rumantschs giaudan gronda simpatia. La politica da linguatg e cultura da la Lia Rumantscha – e dad autras organisaziuns rumantschas – è ambiziusa, mo coerenta e communitgada medialmain bain en tut la Svizra. In bun suttapes era per la CRR e per il post da programs. Nunstanclentaivlamain lavura Chasper Stupan per dapli uras da program tant en il radio sco er en la televisiun. El prepara il terren cun arguments e cun buna lavur a Berna, giauda là la confidenza e vegn uschia da recaltgar ils meds necessaris per radio e televisiun rumantscha en il Grischun.
Betg da far curvien che tant Chasper Stupan sco era Fidel Caviezel s’engaschan ussa per l’autonomia dal post da programs a Cuira. 1992 daventa il post da programs rumantsch ina da las quatter unitads d’interpresa da la SRG SSR. RTR Radiotelevisiun Rumantscha è naschì, Chasper Stupan l’emprim directur. A chaschun da la reorganisaziun da la SRG cloma il nov directur general Armin Walpen 1996 Chasper Stupan en il comité directiv naziunal. Dapi lura è er il directur da RTR commember da quest gremi naziunal suprem, sco quels da SRF, RTS e RSI.
La fin d’avust 2001 po Chasper Stupan surdar a ses successur Bernard Cathomas ina chasa bain fittada ed en urden: 108 collavuraturas e collavuraturs, in program dal di da radio e pliras emissiuns singulas da televisiun. RTR giauda la stima e l’acceptanza dal public.
El sez va en pensiun anticipada cun 60 onns e vul giudair la saira da la vita cun sia consorta Ursi. Ils plans èn fatgs: viagiar en regiuns chaudas, il pli gugent sin inslas da la Grezia u giudair l’abitaziun en il Tessin. Bain spert dentant sa fan udir mals e malsognas. Chasper patescha. Las davosas emnas da sia vita passenta el en la residenza dal Parc Bener a Cuira. (Fontauna: RTR)
L'intervista avant che Chasper Stupan va en pensiun:
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.