Gievgia, ils 9 da fevrer 1984, cuort suenter las 14.00 uras, sederscha la lavina da dalla Val Sogn Placi cun forza stermentusa a val. Ella passa per part sur il rempar construius 1978 ora, desturescha per part la casa Mittelholzer e taglia la csa Schlumpf empermiez, donnegiescha la baselgia da Sogn Placi, splauna igl uaul avon il hotel Disentiserhof, secatscha el restaurant da quei hotel, desturescha la punt dalla via cantunala e quella dalla viafier, serasa el funs dalla val sin ina ladezia d'in pèr tschien meters ed ina altezia da ca. 20 meters, derscha aunc in toc uaul d'ogna da l'autra vart dalla val e staupa il Rein ch'ei dat in grond lag.

En la casa Schlumpf sesanflavan tschun u sis persunas vid il gentar cura che la lavina ei sederschida a val. Quei di haveva dunna Schlumpf fatg pli tard cumissiuns ed aschia era pli tard gentar. Quei ha spindrau ils habitonts da questa casa la veta. Pertgei els han gentau leu nua ch'il balcon secatta. Normalmein da quellas uras havessen els fatg in cupid, gest en las stanzas ch'ein vegnidas destruidas entras la lavina.