Scola da skis Sedrun/Tujetsch

Igl emprem menader dalla scola da skis ei Gustav Walty staus che ha menau la scola cun sia dunna e sia feglia. Sper empalar la scola funcziunava Walty era en in cert senn quasi sco directur da cura. El ei staus in dessignader excellent ed in bien fotograf. Aschia han ins beinspert surdau ad el l'incumbensa dad instradar la propaganda da stad ed unviern. En cuort temps ha il menader dalla scola da skis sviluppau ina stupenta paletta da prospects per omisduas sessiuns e quei en plirs lungatgs. Quels hagien purtau in bien success. Entras sia intermediaziun activa han ins saviu exponer la propaganda da nies liug da cura els marcaus gronds dalla Svizra sco era egl exteriur gia da gliez temps. Sper las offertas per cuost ed albiert dils hotels eri igl ir cun skis per lunsch ora il meglier mied da propaganda.

Igl onn 1929/30 han ins erigiu igl emprem plaz da glatsch sut il hotel Alpsu a Sedrun, naturalmein sut la bitgetta da Gustav Walty che instrueva perfin igl ir cun patinas. A caschun dalla radunonza generala dall'uniun da cura ha Gustav Walty - che haveva dau sco emprem in segl cun skis da varga 50 meters - suttamess la proposta da baghegiar ina schanza a Surrein. Sco il protocollist da lezza radunonza attesta, seigi l'idea vegnida sustenida dalla radunonza. Mo silsuenter han ins buca udiu pli la massa dalla schanza.