L'epoca dallas carrotschas pren sia entschatta

La Gasetta romontscha dils 25 da november 1864 rapporta:

La direcziun postala ha scret ora en libra concurrenza, tgi che vegli menar dil zercladur 1865 naven la posta sursilvana sillas staziuns Cuera-Rehanau, Rehanau-Flem, Flem-Glion, Glion-Trun,Trun-Mustér e pils treis meins da stad fenadur, uost e settember la posta dall'Alpsu sillas satziuns Mustér-Tschamut e Tschamut-Ursera. Las cundiziuns san ils aspirants mirar suenter sils biros postals a Cuera, Glion e Mustér e ston dar en sils 15 da december. Tgei uras che la posta dall'Alpsu vegn a partir a Cuera ed Ursera, nua ch'ella vegn a prender il gentar - sil qual ils ustiers dalla Surselva ein spanegiai - quei ei aunc nuota fixau, bein aber, che la posta sursilvana duei quels meins, ch'ella va buca sull'Alpsu, ir naven da Cuera per las 7 enstagl sco sut il present uorden schon las 6 dalla damaun.

Nova Gasetta Romontscha nr.49, 2 da december 1864

Per cumpletar e per part era rectificar nossa davosa notizia ariguard la futura posta sull'Alpsusavein nus ussa notificar, che quella parti da Cuera allas 7 dalla damaun, arrivi a Glion allas 11 e 5, laschi leu 25 minutas temps da gentar, mondi las 11 e 32 a Trun, arrivi leu l'ina e 30, a Mustér las 15, a Tschamut las 17 e 25 ed ad Ursera las 19 e 30. Allas 5 dalla damaun banduna ellaUrsera, vegn a Tschamut las 7 e 30, a Mustér la 9 e 10, a Trun las 10 e 20 ed a Glion las 12 e 10, leu stat ella 25 minutas e vegn a Cuera las 16 e 35.

Romontscha nr. 4, 27 da schaner 1865

Il menar la posta denter Mustér e Rueras cun ina schesa ni schletra da dus plazs mintgadi priu ora ils treis meins stad che la posta va sull'Alpsu, ei scret ora en libra concurrenza. Las cundiziuns san ins leger suenter el document deponius el biro postal a Mustér, nua ch'ins sa era retrer ils formulars per dar en da menar quella posta, il qual sto daventar entochen ils 4 da fevrer. Gl'accord entscheiva cun calonda mars. Essend che Tschamut vegn ussa honoraus cun in depot da posta, sche san ils vischins aspirar sin quella plazza. Per tener leu la posta ed ir treis dis ad jamna a Rueras pils effects da posta - quei temps che la posta va buca sull'Alpsu - survegnan ei 100 frs. ad onn. Tochen ils 4 da fevrer ston era quels aspirants s'adressar tiel signur postdirector a Cuera. Curascha pia vus speculants giudapeis al Culmatsch e Badus. Vus aber, avdonts dalla venerabla Putnengia, che essas stai aschi disgraziai ariguard la via nova e la plazza fiera, seconsolai e fagei fiasta, a vus ei finalmein daventau salit! Vus survegnis ussa mintgadi las nuvialas digl entir mund e veis era oreifra caschun da mintgadi ir en crotscha ni en schletra. Nova Gasetta

Nova Gasetta Romontscha nr.7, 17 da fevrer 1865

Sco rectificaziun dalla nuviala purtada ariguard il menar la posta sull'Alpsu, remarchein nus, che la staziun da Tschamut ad Ursera, seigi vegnida suradada a signur dr. Christen ad Ursera e buca als frars Meier da leu.

Gasetta Romontscha nr. 26, 29 da zercladur 1867

Annunzia

Il suttascret fa cheutras enconuschent ad in ludeivel publicum, ch'el hagi baghiau si Tschamut ina nova ustria "Zu den Rheinquellen" e recamondi quella a tut quels, che passan leu atras empermettend in bien e dueivel tractament.

Lucas Cavegn a Sedrun