Anna e Battesta Columberg-Lutz ein maridai il fevrer 1949 e secasai en casa melna a Sontget. Battesta *1909, +ca. 1983; Anna *1916, +2016.

Battesta, in dils picturs Columberg. En siu luvratori fierevan ils picturs colur vid la preit per saver giudicar la constellaziun. Culs onns e decennis ei quei semplunau e dau ordlunder enzatgei sco ina structura. Ina part da quei tablegiau sesanfla oz sco "aissa d'art" en la sala da sesidas dalla casa communala a Mustér.

Battesta Columberg sco mattatsch

Battesta Columberg ha era sulerau la crusch che stat sisum il clutger baselgia da sogn Gions, renovada 1974-1977. Cu el sulerava enzatgei prendeva el - avon che prender il fegliet d'aur - il panel e mava tras ils cavegls. Il gras dils cavegls scheva enzaco tschappar en meglier ils fegliets d'aur.

Battesta Columberg sco recrut.

Anna fuva cusunza. Las plunas caultschas - la teila vegneva furnida en ina chista da lenn a Sontget - las plunas caultschas ch'ella ha cusiu per la Viafier Retica, sa probablamein gnanc ella. Lu era sia stiva igl atelier da cuser e lu stueva ella seconcentrar jamnas en ed jamnas ora co tagliar ora, empustir e custer las caultschas - da lezzas uras: ina teila bunamein da carpun. Els han buca giu la quida d'haver agens affons. Denton, els ein stai tochen tier la mort da Battesta ca. igl onn 1983, ina dètg gronda famiglia. La Bernadette, la Ruth, la Susi, l'Esther, la Hilda, il Heribert - per no numnar enzacons nums, ein stai mintgamai in alla ga, tgi pli ditg e tgi pli cuort e quei sur onns ora tier ils conjugals Columberg. Quels affons da famiglias meins beinstontas, vegnevan intermediai a Mustér tier l'Anna sco era tier sia sora Hedi tras igl "Antoniushaus da Solothurn". Ton sco enconuschent, han quels affons adina saviu star gratuitamein tier ellas. Bein ina ovra da misericordia - tut speciala!

La Susi: Ina dalla buobas ch'ei stada en vacanzas tier "ils Columbergs".