La foto ei prida si gest sur la casa dils Furgers. Quei che croda si ei che la plaunca encunter la Furtga ei niua. Sisum [sur la buoba nunenconuschenta] ei la tauna dil cucu, aunc oz veseivla.

La plazza da ballapei ei vegnida baghegiada ca. 1926. Surlunder dat ei enzatgei correspundenza. Pli tard surveva quella plazza oravontut als students claustrals. La plazza propi per dar ballapei per quels da Mustér sesanflava a Fontanivas.

Pli tard, entuorn 1967 ei vegniu eregiu ina "stermentusa" plazza da ballapei. Quella ha fatg enzaconts onns siu survetsch. Denton ils 1975, 1978 e 1984 ein pli gronda lavinas sederschidas dalla Val sogn Placi giu ed ins ha stuiu ereger ina ustonza che canalisescha las lavinas. Entras quei ei la plazza vegnid sminuida, aschia ch'ella haveva buca pli la dimensiun perscretta.

Era 1967 han ins eregiu ina schanza seniester ella plaunca. Mo sin quella ha mai enzatgi saviu siglir, pertgei sch'ei havessen ughegiau quei, fussen ei tier la setschentada probablamein sesturni.

Oz ei l'entira plaunca carschida en cun caglias e pegns. Il mir dalla schanza stat aunc.