Mintga premaveira, cura tgi la neiv livava,

igl "Lai" an fatscha a Plaz-Baselgia sa furmava.

Rostg, rangla, quatterpagletscha ed overa

aint igl lai cattava lour datgesa.

Cun lour quac, quac regular e monoton

i sa laschevan santeir mintg'onn,

vulend sa participar an sia furma uscheia,

alla processiun da Venderde Sontg tgi passava sen veia.

Betg adegna eran igls bogls paradis nindisturbos

savens nivan igls amfibis mulestos

da noschs mattatschs tg'igls mazzacravan,

tg'igls faschevan fimar anfignen tgi schluppavan.

Igl "Lai" era en li idilic ed interessant

per mintga mument liber en divertimaint.

Punts e bartgas èn neidas construeidas

per far, an bartga sur igl lai, scurreidas.

Eir da pôssa, avant u siva scola giu sper l'ava

l'antiera cumpagneia era fascinada

ainten l'ava bagnenqual è crudo malamaintg

currond a tgesa cregnbletsch alloura spertamaintg.

Scola nova, festa da cant! Duvragn en areal!

Igl "Lai" igl noss pi bel li, è stò davent. O tge fatal!

Cun tgargias material, drenaschas, sainza respect oramai

è chesta pedra naturala svaneida per da fegn ... igl "Lai".

*Igl "Lai" da scola (ca. 80m lung, 35m lartg, anfignen 1.50m fons)

1961/62 biagia la scola nova / 1966 festa distructuala da cant segl plaz da sport actual.

Poesia e fotografia ord igl archiv Fam. Capeder, Salouf. La fotografia e fatga da Pader Alexander Lozza, ca. 1944/5.