La chasa Chalavaina
La chasa Chalavaina
Ün stabilimaint cun blera istorgia. La Chasa Chalavaina, hozindi ün hotel, daja daspö 770 ons ed ha scrit istorgia ed istorgias. L'episoda la pü cuntschainta es quella da 1499. Sülla lobgia da la Chasa Chalavaina dess il cumandant da guerra grischun Benedetg Fontana avair dat cumonds als 6000 sudats chi's vaivan ramassats sül Plaz Grond perl cumbat cunter las truppas austriacas e habsburgaisas.
Il di davo d'eiran confruntats ils Grischuns cun ün'armada dublamaing plü gronda illa stretta da Chalavaina. Malgrà tuot hana guadagnà la battaglia.
Dürant var 50 ons, fin la fin dal 2021 ha Jon Baptista Fasser manà la Chasa Chalavaina. Legendaras sun sias istorgias e la collecziun da tuot ils objects chi orneschan la chasa. L'uster da passa 80 ons ha lura tscherchà activamaing üna successiun. Daspö l'onn 2022 ha l'hotel Chalavaina ün avegnir solid grazia a la fundaziun Chasa Chalavaina. Quella ha cumprà l'hotel, e l'intenziun es da mantgnair il caracter oriund da la chasa cun deschdot stanzas da giasts, la stüva, la cuschina naira ed il grond üert.
L'inter relasch fotografic da Gian Battista Gross (1883-1961) i'l Archiv dal stadi dal Grischun cun fotografias da tuot la Val Müstair es gnü digitalisà ed es accessibel online.
Staatsarchiv Graubünden / StAGR N2.295 Chasa Chalavaina, Nordwestansicht / Fotograf: Gian Battista Gross (1883-1961), Tschierv / CC BY-SA 4.0 / Archivinformationssystem Staatsarchiv Graubünden
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.