Ei ha duvrau plirs stauschs per baghegiar 2 stallas sin l'Alp Dado da Pitasch. Ils 18 da schaner 1925 ei la decisiun curdada en favur da duas stallas per 44 vaccas. La tegia da caschar e suttetg existenta ch' era ca. 200 meters sut il satavel dad oz, oz Stavel Veder, ei vegnida dislocada igl onn 1912, pia 14 onns avon el liug dad oz. En tegia el planschiu da betun ei l'anada 1912 perpetnisada. 1913 survegn la vischnaunca 2'000 francs subvenziuns per las lavurs!

Extract da protocoll 1925: Sin giavisch d'ina iniziativa vegn la damonda sur digl baghegiar il nuegl sin l'Alp Dado tractandada! (l'iniziativa ha ei duvrau sinaquei che la radunonza ha refusau la damonda, ina votaziun 10 gie ed 12 na)

La radunonza concluda da baghegiar il nuegl sin l'Alp Dado el termin da 1925 e 1926 e buca greviar las vaccas pli che 3 francs per cadeina. Concludeu cun 10 gie e 3 na. Votants 20!

Lautra radunonza giavischa in vischin da baghegiar schi favoreivel sco pusseivel ed buca engraviar ils privats.

Igl onn 1926 paga la vischnaunca 2'412 francs e 42 raps a 19 purs e privats sco era in quen per maglias pils luvrers ed alla stizun in pagament per guottas. Sin dundament d'in rapport dalla Regenza Grischuna apertenent las finanzas communalas, dils 12 da november 1926, han las stallas cuostau 13'000.- fr. La construcziun dils mirs schetgs ch'ein semanteni fetg bein han caschunau quels cuosts.

Las lavurs ein vegnidas fatgas tut en lavur cumina. Pinau e tagliau tier la lenna, fatg mirs schetgs e fatg tetgs da schlondas. Oz ina caussa nunpusseivla. Aunc ditg vegneva raquintau sco ils cavals hagien tratg la lenna dalla spunda si el stavel niev. Denton per cura che la fumeglia ha saviu mulscher en stalla e schizun saver metter las vaccas da neiv en nuegl han ils adversaris viu en che la decisiun ei stada endretga.