Scu paia per la lavour tar las provas ed igls concerts e per aveir taimp avonda per galdeir la cumpagneia è igl chor adegna puspe ia sen viadi noua tg'ins era liia ve da nigns angaschamaints. La destinaziun la stad 1971 è stada Verona noua tgi vagn galdia ainten l'arena sot tschiel avert la represchentaziun dall'opera da Giuseppe Verdi "Aida". Siva dalla festa da cant sursilvana a Lumbrein e la registraziun dall'amprema platta fonografica digl chor "Canta er Te!" egl puspe sto ouras dad eir sen viadi, chest'eda cunter nord an la val digl Ragn a Rüdesheim/Heidelberg. Treis onns pi tard è la destinaziun stada la Svizra franzosa cun dimora a Bulle cun visita tranter oter dalla cuntrada dalla Gruyère e las vegnas digl Lavaux. Igl 1990 è igl chor sto 3 deis a Colmar an Alsazia. Oters viadis èn stos an cumbinaziun cun festas da cant ni oters angaschamaints. Cun crescher la mobilitad individuala eran chels viadis tradiziunals er betg ple schi dumandos.

or dalla cronica digl chor