Ina secunda finamira dallas societads reunidas - musica e chor - ei era stau da far teater. Nus vevan quels onns commembers activs en omisduas uniuns. Ina persuna che ha fullau via e prestau gronda lavur per che quei reusseschi ei stau igl augsegner da nossa pleiv. Sur Giusep Durschei ei staus nies plevon a Danis-Tavanasa dils 1940 – 1948. En quels onns ha el tgirau in grondius contact, seigi quei cun la societad da musica ni cul chor mischedau. El ha giu translatau entgins dramas e surpriu la reschia dil teater. Cul grond sustegn da Gion Deplazes, igl emprem scolast secundar a Danis, han els dus anflau immediat acturas ed acturs ch’ ein stai fiug e flomma pil teater. Ils meins d’ atun entschevevan ei baul cun las emprovas. Ils exercezis da cant e musica vegnevan fixai per il meins da schaner, cu ils purs fuvan turnai culs muvels el vitg. La collaboraziun denter las uniuns, baselgia e scola ha menau ad in success cumplein. Ils onns precedents han dau anim e cuntentientscha als acturs dil teater. Il giugar sin tribuna veva svegliau igl interess. La sala pleina d’ aspectaturas ed aspectaturs ei bein stau la pagaglia pil grond engaschi e la presentaziun gartegiada.

«Inescadin», translatau da Sur Durschei, in drama che ha pretendiu grond engaschi sin tribuna. Quei toc ei vegniu giugaus sis gadas. Las presentaziuns vevan liug pil pli il suentermiezdi. Il motiv fuva ch’ ils visitaders stuevan vegnir cul tren ni a pei. Autos privats fuvan rars. Il prezi per plazzas reservadas muntava 3.-frs. e l’ entrada dil di 2.50 frs.

La sala da teater en scola veglia veva plaz per ca.120 persunas. Ils aspectaturs sesevan sin sutgas modernas ch’ ins saveva volver il sez. Quater sutgas formavan in stausch in vid l’ auter. Las sutgas numeradas vevan ins saviu cumprar ord ina veglia sala da concert en dil Liechtenstein. La tribuna stgir verda fuva alzada ora, aschia ch’ins veseva bein ils giugadurs. Ina moderna illuminaziun en pliras colurs deva la dretga tempra allas acziuns, tut tenor la scena da di, sera ni notg. La tenda grischa vegneva tratga a maun cun ina suga che tgulava sur la rolla. Il publicum capeva fetg bein il text, fuvan gie biars acturs ed acturas era bunas cantaduras e buns cantadurs cun vuschs claras e fermas. Diversas culissas enramavan ils acturs sin tribuna e devan alla presentaziun la dretga tempra.

La sala da teater endrizzada en la casa da scola baghegiada igl 1938 ha surviu entochen il 1976 sco local per tuttas occasiuns musicalas, canticas e teatralas. En connex cul niev baghetg dalla scola 1976 ei la sala veglia vegnida transformada en in luvratori e local da zambergiar per las scolas. Il far teater ha denton cuntinuau en fuorma da tocs humoristics a caschun dil concert annual ni la sera da famiglia. La collaboraziun denter la musica ed il chor mischedau funcziuna vinavon fetg bein. Quei confirman ils concerts communabels e l’ organisaziun d’autras fiastas. La societad reunida exista buca pli, mo ei regia vinavon ina buna harmonia denter las uniuns culturalas che sunan e contan. Viva la musica ed il cant !

Regurdientschas da Ciril Friberg (anteriur dirigent dalla musica)