Fiasta d‘ uaul a Danis-Tavanasa

L‘organisaziun dalla fiasta d’uaul fuva els mauns dallas duas societads reunidas, la Societad da musica ed il Chor mischedau. Quellas duas uniuns vevan ord quei intent giu fundau quella reuniun dapi biars onns. Il Chor baselgia separticipava sco hosp, quei che deva adina discussiuns e malaveglia. Naturalmein retschevevan els ina bunamana per lur producziun cantica il di dalla fiasta.

Gia avon ils onns 1940 entochen l‘entschatta dils 1970 ha quella fiasta giu liug mintg‘onn da Gliendisdis Tschuncheismas, in termin nudau cun tgietschen el calender. Sin la via d‘uaul che meina gest dadens la punt da Tavanasa arrivavas ti sil plaz festiv. Igl ei ina pastira planiva, in liug idilic, tschinclaus da pégnuns bracs e barbus. Il num Runcau tradescha ch’ ins ha a siu temps cun lavur cumina giu dersch entginas plontas, ulivau il terren ed aschia garantiu in bellezia toc pastira. Ina tribuna cun in tetg, in baghetg stabel surveva per tuttas producziuns da cant, musica, saults populars ed enqual toc humoristic. Ina musica da sault carmalava ils saltunzs sin tribuna. Beinenqual ha anflau cheu sia emprema amur!

Quella fiasta valeva en la regiun per ina dallas bialas sentupadas che carmalava in grond pievel dall’entira vallada. Allas 13.00 uras sescumiavan ils dus trens si da Glion ed engiu da Trun alla staziun. La musica beneventava il pievel festiv cun in marsch e lu vegneva mar-schau tras il vitg viers il Runcau. Ei ha dau onns ch‘ins ha era envidau las musicas dil contuorn alla fiasta, adina puspei in’autra: Sursaissa, ni Breil, Dardin ni Trun. Aschia fuvan bauns e meisas occupai sil pli davos plaz.

Per pign e grond era quei in di festiv da sedivertir. Ils pigns pescavan pachets ord il zuppau ni empruavan il cletg cun sittar sin la piramida da cuppas. Igl iral da heighels, in indrez da trer paliats ed il stan da sittar carmalavan ils carschi da concuorer. Jeu sai seregurdar ch‘ ins ha dau heighels entochen stgir per eruir il campiun dil gi. Il tschentar heighels era il davos ualti stuffi, denton savevan nus buobs ch‘ei detti ina stupenta bunamana per la lavur prestada.

Avon ch‘ins ha saviu cumprar entiras garnituras da bauns e meisas, vegneva tut endrizzau cun pals ed aissas. Quella lavur preparatorica duvrava pliras jamnas. Mathias Beer ei stau il cau da quella fiasta entochen la fin. El menava ina gliesta exacta dallas lavurs da mintga commember. Tenor la lavur prestada survegneva l‘uniun la bunamana dil gudogn. Ei ha dau buns e schliats onns, tut tenor l’aura da quei di.

La musica da Schwamendingen ha era sunau alla fiasta d’uaul, 1959.

Il baghetg cun la tribuna ei daventaus l‘ unfrenda d‘ in barschament l‘ entschatta dils onns 1970. Ina reconstrucziun ei buca stada en damonda. Il motiv ei stau ch’ina gronda part dil terren ha surviu per l’extrada neu da Trun en connex cul sviament da Tavanasa e la punt nova da 1976. Il rest dil plaz survescha oz alla vischnaunca per deponia da material da vias e rasenas da lenna. Per las duas uniuns ein quellas entradas stadas duront onns da gronda impurtonza. Suenter il barschament ein ils daners en cassa vegni repartgi ulivamein sin las uniuns e la societad reunida ei vegnida sligiada. Il num Runcau screts vid in crap dil mir sper via regorda aunc vid las bialas fiastas d’uaul. Tempi passati.

Regurdientschas da Ciril Friberg (anteriur dirigent dalla musica)