Igl maletg mossa dasper tranter igl Hotel Albula ed igl Hotel Julier la remisa per las carrotschas digl Hotel Julier. Da veir ègl er igl Hotel Julier dretg, biagia igl onn 1870, dretg da mang sot bagn da veir en las stallas ed igls uigls e remisas per metter sot tetg igls tgavals.

Igl Hotel Julier a Casti/Tiefencastel è nia biagia igl onn 1870 da P.de Giacomi & Co.e davert offizial igls 24 da fanadour 1870. Igl Hotel cun 41 tgombras per giasts, salons, tgadafi etc., e vetiers ena remisa e stallas en causa da concurs-fallimaint, nias intganto igls 4 da favrer 1878. Scu nov possessour vign numno Gallas Lanzio-Fasciati (1845-1885) ord la lingia digl «Landamin» da Beiva. Siva digl onn 1883 segna igl chino da Gallas, Andrea Lanzio-Lanzio (1848-1907) ord la lingia digl «Landamun» da Beiva scu possessour. Andrea venda igls 15 da november 1892 igl Hotel cun tottas possessiuns ad Etienne (Stefan) Bossi da Surava per la somma da CHF 150'000. An successiun vign igl Hotel mano dalla Famiglia Bossi an treis generaziuns. Igl onn 2000 compra igl hotelier vaschign, Rico Schnöller igl Hotel e magna ed integrescha tal cun grond success agl Hotel Alvra, Casti/Tiefencastel. (ro)