Il traffic permanent sur l'Alpsu ha animau entginas famiglias da nezegiar la caschun per ereger casas d'albiert sil Cuolm d'Ursera. Alla fin dil davos tschentaner ha Leonard e pli tard Julius Christen baghegiau davart encunter sera dil lag in hotel cul num «Kur- und Posthotel Oberalp au Lac». Entuorn ils anno 1920 ei quei hotel vegnius acquistaus da Alderich Meyer. Enconuschents ei il hotelier «Miggi» Meyer, in um original, versaus en plirs lungatgs che fageva era guid da muntogna e scolast da skis. Denter ses renomai hosps ha el saviu beneventar igl onn 1921 il davos imperatur austriac, Carli I. Cun plascher e luschezia raquintava il «Miggi» da quei niebel hosp cun sia suita e dil Cabriolet luxerius, cul qual el carrava sul pass.

Suenter paucs onns ha la famiglia Nager, proprietaria dil hotel Sonne ad Andermatt, cumprau il hotel, fatg midadas e numnau el «Hotel Oberalpsee». Els han dirigiu quella casa entochen igl unviern 1951. Ina nauscha lavina ha destruiu il hotel totalmein e Paul Nager cun sia consorta Attilia ein vegni satrai sut las nevadas e stuiu murir, probablamein sut circumstanzias crudeivlas (20-1-1951). Oz vesan ins mo aunc in per restonzas dils mirs da quei hotel. (Cudisch da Tujetsch, 1986)