Scuol

La ragisch da quist nom es – cun fich gronda probabiltà – il pled latin «scopulus», quai voul dir «spelm» o «grip». Quista derivanza es plausibla impustüt schi's resguarda la posiziun da la baselgia sün ün grip marcant sur la riva da l'En. Il grip sunteri ha dimena dat il nom a tuot il cumün. Il territori dal cumün da Scuol - cun raduond 4 700 abitantas ed abitants - s'extenda sur 14'414 ha. Il Piz Sesvenna cun 3'204 m s.m. es il punct il plü ot, il punct il plü bass es Pradella Sot cun 1136 m s.m.

Scuol as rechatta immez la uschèditta fanestra geologica da l'Engiadina Bassa. Tanter Guarda e Prutz (Tirol) s'ha sviluppada l'erosiun uschè ferm cha'l plattai grischun (Bündnerschiefer), zuoglià oriundamaing da cuvertas cristallinas e dolomiticas, es gnü visibel. Da quista vetta porusa sortan numerusas funtanas mineralas d'ota qualità. Grazcha a quistas funtanas s'ha sviluppà il turissem da bogns a Scuol e Tarasp illa seguonda mità dal 19avel tschientiner.

Il prüm manzun da «Schulle» datescha circa dal 1095, e quai in connex culla fabrica d'üna clostra da Benedictins e d'üna baselgia. Plü tard possedaivan las clostras da Mariadamunt e da Müstair, ils signuors da Matsch e la chasa d’Austria plü o main tuot il territori dal cumün da Scuol. Cul ir dal temp s’ha diminuida l’influenza estra, ma pür dal 1652 s’ha l'Engiadina Bassa cumprada libra da l’Austria.

L’Engiadina Bassa e cun quai eir Scuol han gnü da patir suot las invasiuns da truppas austriacas e francesas. L’on 1499, in connex culla guerra svabaisa, han 8000 sudats da l’imperatur Maximilian plündrià ed incendià tuot ils cumüns in Engiadina Bassa. Dürant la guerra da trent’ons es Baldirun irruot trais jadas in nossa val. Dal 1621 sun gnüdas sias truppas our da S-charl. Las duonnas da Scuol han cumbattü valurusamaing e güdà ad impedir cha las truppas austriacas possan traversar l'En. Daspö quella jada han las duonnas a Scuol il privilegi da sezzer in baselgia da la vart dretta. La fin dal 18avel tschientiner han truppas francesas ed austriacas occupà tuot l’Engiadina e chaschunà miseria e povertà.

La baselgia San Geer (San Georg) es gnüda fabrichada al cumanzamaint dal 16avel tschientiner ed inaugurada dal 1516. Fingià dal 1530 es gnüda introdütta la refuorma a Scuol ed infra pacs ons in tuot l’Engiadina. La refuorma ha svaglià l’interess pel pled scrit. Dal 1659 chattaina a Scuol üna stamparia ed ün muglin da palperi. L’on 1679 cumpara illa stamparia da Jachen Dorta giuven la prüma Bibla da Scuol in lingua rumantscha. Da la stamparia da Jacob N. Gadina in Bügl Grond sun sortits, sper la seguonda ediziun da la bibla (1743) blers cudeschs e stampats. La «Gazetta ordinaria da Scuol», la prüma gazetta dal chantun Grischun insomma, es cumparüda dal 1700–1726 e redatta dal chancellier Joan Marnia. Quist hom ha giovà üna rolla importanta illa politica dal cumün da Scuol. Sia statua as vezza sülla pütta dal bügl in Plaz.