Cumedgia a Sent
Cumedgia a Sent
L’üsanza da cumedgia vaiva lö in plüs cumüns. Hozindi es quist’üsanza ida in invlidanza. La cumedgia nun ha lö, sco otras üsanzas, regularmaing. Pro la cumedgia sto esser la dretta persuna al dret lö. Sch’inchün dudiva ch’in cumün vaiva inchün l’intenziun da mazzar ün armaint grond, lura gniva provà dad ir ad ingolar la vacha o’l bouv. Impustüt la giuventüna e’ls maridats laivan ingolar quista bes-cha dal paur o da quel chi laiva mazzar sia be-scha. Eir scha quai d’eira ün secret, gniva adün’oura il fat. Schi gratiaiva d’ingolar l’armaint, schi das-chaivan „ils laders” far üna festatscha. Pel solit gratiaiva a la giuventüna d’ingolar l’armaint. Cun quai cha la gronda part dals giuvenils d’eira be la fin d’eivna a chasa, d’eira da perchürar la bes-cha per part ün pêr nots. Els manaivan la bes-cha in üna stalla e faivan guardgia cun fuorchas e fotschs. Ils maridats improvaivan nempe d’ingolar la bes-cha da la giuventüna, per ch’els pudessan far la festa. Ils giuvens vaivan dimena eir da star la not a far guardgia. Quai d’eira adüna tuot lustig, cun quai chi’s d’eira in cumpagnia e’s bavaiva eir l’ün o l’oter vin chod. Il di avant cha la be-scha gniva mazzada daiva lura la gronda festa cun ün cortegi tras cumün. L’avantmezdi gniva la bes-cha decorada cun fluors. A las 13:00 gniv’la lura manada our d’stalla e manada dal „bacher” tras cumün. Tuot la giuventüna pigliaiva part al cortegi. Ouravant giaiva la musica, segui da la vacha cul „bacher”, ils chavalgiaints e quels chi schloppaivan la giaischla. Las lavunzas, chi gnivan eir nomnadas las strias, giaivan cun ün test plain charbun davo il cortegi. Minchün gniva s-charbunà; a la fin nu daiva ningün chi nu d’eira s-charbunà. Ils giasts chi nu savaivan da che chi’s tratta, gnivan per part grits. Cur cha’l cortegi d’eira a fin, as chantaiva la chanzun da la cumedgia. La saira stuvaiva il paur, dal qual i d’eira gnü involà l’armaint, far üna tschaina per tuot ils giuvens. Els nu faivan quai invidas, ma i d’eira listess da pajar per tuot la giuventüna. Quist’üsanza es ida a perder, causa ch’hozindi esa scumandà da far mezcha in chasa.
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.