In exercezi da lavinas dil survetsch da lavinas dalla vischnaunca da Medel/Lucmagn. Ils 6 da fevrer 1993 si Tegia Nova. Gia cuort suenter igl onn da lavinas 1974/75 ha la vischnaunca da Medel baghiau si exemplaricamein in agid e sustegn communal en cass da lavinas e seracass entras grondas nevaglias. Aschi baul ei quei succediu sco ina dallas empremas vischnauncas el cantun Grischun sin palancau communal. Suenter las sgarscheivlas catastrofas da lavinas digl avrel 1975 ein las autoritats communalas vegnidas confruntadas cun problems en dimensiuns extraordinarias. Medel ha giu gronds donns vid baghetgs e cultira e donns d'animals da casa.

Denton la mort da treis da nos convischins d'Acla ei stau ina sperdita ch'ins sa buca cumpensar. Ils baghetgs destrui ein danovamein vegni reconstrui. Plinavon ein ils praus e las pastiras devastadas vegnidas runcadas e schubergiadas. Igl uaul devastau ei puspei vegnius replantaus. La sperdita da nos treis convischins - dil Battesta Flepp e siu fegl Urs e dil Maurus Venzin - ha buca saviu vegnir remplazzada cun enzatgi auter. Ulteriuramein ei il vitg d'Acla dapi quei unviern buca staus habitabels igl entir onn pli. Suenter quei unviern ha in niev temps entschiet per nossa vischnaunca. Las negligientschas ed ils problems ch'ein vegni alla glisch, cu tut ils vitgs en vischnaunca eran isolai sur dis ed jamnas ora, han menau la vischnaunca da Medel/Lucmagn ad ina organisaziun da prevenziun. Pius Condrau, il menader dalla Collona d'agid da Mustér, ei sepresentaus tier las autoritats communalas per segidar a baghiar si in'organisaziun che duess funcziunar en cass sco igl ei succediu igl unviern 1974/75. Quei ei stau la naschientscha dil Survetsch da lavinas dalla vischnaunca da Medel/Lucmagn.

Davos da seniester: Clau Venzin, Gerold Bundi, Arthur Venzin, Pauli Pally, Gerold Lutz, Armin Bundi, Leo Venzin, Siegfried Bundi e Placi Venzin

Davon da seniester: Constantin Venzin, Duri Lutz, Werner Giger, Daniel Bundi, Claudio Pally, Clau Beeli e Bruno Bundi