Il gial süsom il clucher da Soncha Maria ha quintà:
Inschmanchabels am sun restats ils dis cur chi vaiva nom: „Hoz jaini a spass!“ Cun salzers da muntogna ed üna buscha implida cun marenda as radunaivan las classas sün Plazzetta e spettaivan cha la magistra cloma: „Gni dò mai, nu pitschens jain ora Guad, ils gronds vaun sül Lai da Rims!“

E cur cha la chascha da scoula d’eira implida culs raps da Chalandamarz, gniva organisada üna spassegiada da plüs dis chi tils manaiva in terras estras: in Engiadina, a Cuoira, a Turich, sül Rütli o fin a Berna. Quai d’eiran evenimaints inschmanchabels. Eu m’ allegraiva mincha jada cur cha la classa tuornaiva a chasa chantond la chanzun tradiziunala culs pleds da lur magistra Chatrina Filli.