Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
La pagina tetgala: historiaHelvetica
1731 - cunvenziun pertuccont l'alp Nalps da  Magher/Tujetsch

1731 - cunvenziun pertuccont l'alp Nalps da  Magher/Tujetsch

1721
Archiv cultural Tujetsch

Anno 1721, ils 16 d’uost en Disentis

Da saver suenter quei che gl’ei per temps stau levau si differenzas u dispetas denter ina ludeivla cuminonza u vischnaunca da Tujetsch per ina part, allura ils pursanavels dallas duas caschadas en l’alp, numnada Nalps da Magher da Disentis per l’autra part, perquei e davart che la ludeivla vischnaunca da Tujetsch selamentava, ch’ils pursanavels dalla numnada alp hagien fatg lenna e sesurviu encunter dretg en uauls dalla vischnaunca, leu encunter quels plonschiu pretendiu da haver tals dretgs leutier e per quella fin, fagend ni insistend sin lur vegl possess, ein stai encunter, aschia e talmein, che lur schon currenta dispeta era carschida en in dretg e zun maneivel, enten in custeivel dertgem, vess pudiu rumper ora, per quella fin, per vegnir avon a quei spargnar malnizeivels cuosts e per plinavon flanziar quella bunaveglia harmonia e correspondenza, che cunfinava denter Tujetsch e Mustér e quella mantener tras bein manegiada interposiziun ed amicabels plidar da (: tit :) signur vegl landama e podestat Florin de Castelberg e signur statalter Jacob Schuoler, geraus da Disentis ed enten vertit dils projects fatgs, seigi dils numnai signurs quella vertenta dispeta enten buna ed amicablamein vegnida lugada ed agiustada e dad omisduas parts vegni prida si reciarti sco suonda.

Emprem eis ei accordau e vegn a quels suranumai pursanavels ed a lur artavels e vegnentsuenter dau autoritad e pussonza e dretgs e schau dad ussa naven en perpeten ni per tut igl avegnir da enten uauls dalla numnada vischnaunca da Tujetsch che cunfinan cun la numnada Alp Nalps da Magher, schibein da quest, sco da l’auter maun dil Rein, che flessegia permiez tras las Alps da Grass e Magher, da better entuorn lenna da tagliar e far ora slondas e sesurvir da baghegiar, schibein baghetgs novs, sco per mantener ils baghetgs vegls enten la numnada Alp Nalps da Magher enten tala fuorma che enten sesurvir dalla lenna deigien ils savens numnai pursanavels adina ira successiv suenter igl uaul, quei ei entscheiver sin in maun ed ira suenter, e sesurvir ni usufructuar deigi e possien e cheutier ver ils dretgs, resalvond e tenend ora la Tgauma dil Crest Derschlaus, che dalla vischnaunca ei scumandau ni fatg schetga dil qual liug scumandau e dad autras schetgas dalla vischnaunca che cunfinan buca cun quella alp deigien ira lischents e leu haver negin dretg ni autoritad da lennar.

2. Sch’ei vegness il basegns, u scartezia als pursanavels da caschar ni per auters basegns da barschar, ni sesurvir tier il fiug da lenna, lura deigien els haver ils dretgs sin igl intschess ni district dalla vischnaunca da Tujetsch da sesurvir da draussa e bostga, mo dad auter oreifer quei sco sisura ei scret schi bein da verd ni sec ni tgei num ch’ei pudess ver tuttavia ira lischents e schanegiar.

3. Per pli fortificaziun e giustiment ni cumposiziun ed era per ina consolaziun alla ludeivla vischnaunca da Tujetsch, deigien ils pursanavels sin d’atun che vegn sbassar e dar en daners bluts, risculdis tschuncontaquater, dic 54 fl. ni aber en cass ch’els dessen buca giu il capital, sche deigien dad oz dato naven e mintg’onn sin s. Martin esser obligai da tscheinsir 3 x per risculdis schiditg aschi liung sco els vegnien a ver pagau giu il capital.

4. Las spesas aber ch’ein derivadas ni dependan da quella cumposiziun eis ei per miez ed aschia vegniu taxau da scadina part porta la mesa quota.

Ch’ei seigi aschia vegniu accordau, cumponiu, priu si da salvar ed empermess da vegnir suenter e vegnir stabiliu, sche han omisduas parts flis e detschartadad rugau il (: tit :) ussa regent signur landama Gion de Fontana ch’el per pli perdetga e per pli ferm salvar vegli sin quella squitschar il secret sigil dil cumin da Disentis, il qual el ha fatg agli als ses ed agli cumin senza ni donn ni pregiudezi, ed en per tala fin fatga dus semeglionts instruments che plaidan in sco l’auter, omisdus sigilar cun il sigil dil cumin ed a mintga part consignau in.

Ti stos esser connectà per agiuntar in commentari
Nagin commentari il mument
Archiv cultural Tujetsch
1,212 contribuziuns
27 avust 2023
33 guardads
0 like
0 favurit
0 commentari
3 Collecziuns
Network:
Sponsurs:
17,218
856
© 2024 FONSART. Tut ils dretgs resalvads. Dissegnà da High on Pixels.