La Gasetta Romontscha dils onns 1860 rapporta pliras ga davart quei project gigantic. Aschia plaida il rapport dalla emprema gasetta digl onn 1861: El novissim temps eis ei vegniu alla glisch in project per ina fusiun dallas rivalisontas viasfier sul Gottard e Lucmagn. Tenor quel duessen ins menar la viafier alpina naven dil Lag da Lucerna tochen sur Amsteg, da leu ella Val Maderana e tras in tunnel da 7 - 8 kilometers, circa in’ura e mesa, sut il Pass Krüzli a Sedrun e da leu sul Pass Lucmagn. Sin quella moda savessi ins unir la Svizra Meridiunala e Centrala cull’Italia tras ina viafier che custassi 14 milliuns pli pauc che quella sul Gottard. Ei para ch’ils Tuatschins, che vulan „nuet“ survegnan tut: la via sul Cuolm d’Ursera e la viafier cun in stupent „bahnhof“ el Plaun Sedrun.

Pil concret plaida igl artechel dil fenadur 1863: ... Per unir las respectivas tendenzas dalla Svizra Centrala cun quellas dalla Svizra Orientala, manegia era el (igl inschignier La Nicca) ch’ei seschassi menar la viafier naven dil Lag da Lucerna tochen ad Amsteg, da leu tras la Val Maderana cun in tunnel dad ina ura e mesa sut il Crizli ella Val Mila tochen tiel venerabel casti de Putnengia sper Rueras, nua che la viafier da Cuera suness cun ella per communablamein formar la viafier sul Lucmagn.

Sedrun e Rueras survegnan da quei temps in num renomau ed enconuschent enteifer las afferas pervia dalla viafier alpina. La Gasetta Romontscha digl uost 1863 cuntinuescha: Nus vein schon menziunau che nies signur colonel La Nicca hagi encuretg d’unir ils interess dalla Svizra Centrala e Svizra Orientala tras ina viafier naven da Lucerna ad Amsteg e da leu tras il Crizli a Sedrun per s’unir a Tujetsch culla viafier dil Lucmagn. La gasetta da S.Gagl porta ussa in artechel titulaus “Ina vusch da reconciliaziun” tras il qual ella recamonda cauldamein la lingia Lucerna-Sedrun; quella sligi si il nuv gordonic el present viriveri dalla viafier alpina; per quella lingia duei tut scriver e plidar, mo quella sappi puspei unir las partidas dalla Svizra, aschia che nos cars babuns vegnessien aunc en fossa a selegrar lundergiu etc.