nossaistorgia tschertga, ensemen cun il Museum naziunal svizzer: fotografias d'automats. Grazia per la publicaziun da talas fotografias qua sin nossaistorgia.ch!

Dapi insaquants onns vegn discutà mo pli da sefies. Il boom sin las medias socialas ha augmentà il trend dals selfies. Avant il temp dals smartphones vegnivan ils autopurtrets fatgs en automats da fotografias.

Ils automats da fotografar sa sez a la staziun u avant ni en ils negozis da cumpra han marcà la cultura visuala dal 20avel tschientaner. Las pitschnas fotografias quadras han servì a documents uffizials (p. ex. la carta d'identitad brina), ma era en auters secturs.

Per 1-2 francs han ins pudì far ina fotografia da sa sez, d'amis, inamurads u parents da famiglia. La cabina cun sumbrival ha lubì da far fotografias spontanas senza s'exponer avant la publicitad. Senza turpetg han ins ris e dà bunas, fatg grimassas ed autras rollas en la cabina dal automat.

Il Museum Naziunal Svizzer tschertga cun agid da nossaistorgia.ch fotografias d'automats da l'entir Grischun. Il museum vegn ad exponer ina part da quellas fotografias da l'entira Svizra fatgas dal 1971 - 1999 en ina exposiziun. Il resultat vegn ad esser da vesair davent dals 17 da mars 2023 en il Landesmuseum a Turitg!