Duas dunnas cun speciala historia
Duas dunnas cun speciala historia
Dretg sesa l'Onna Maria Derungs-Jacomet (1880-1954) da Sedrun, feglia da Placi Sigisbert Jacomet (1846-1928) e Maria Catarina Mirer (1848-1914). Ella ei emigrada 1903 ed arrivada ils 28 da november 1903 a New York cul bastiment La Touraine naven da Le Havre ils 21 da november 1903. Returnada ils 26 da settember 1908 e maridau Gion Mihel Derungs. Il Gion Mihel (1857-1917) fuva medemamein sil bastiment per far ina viseta ella patria. La finala ein omisdus restai en Tujetsch e fundau famiglia.
Suenter la mort da Gion Mihel, naven dils 1917 entochen 1954, igl onn da sia mort, ei l'Onna Maria stada sco 'caucasa' ina dunna energica che saveva sco vieua era seriscuder anoviars. Ella, ensemen cun siu fegl Casper (1911), han fatg in tec il pur. Mo els eran situai finanzialmein fetg bein, aschia che quella vieua cun quater affons ed il quinau Gion Giusep Derungs ein vegni senza rentas bein atras la veta.
Ses daners manischava ella suveranamein, empristava dapertut daners e formava ton sco ina banca privata. Era la vischnaunca veva stuiu far diever da quella pusseivladad ed empristau 35'000.-. Quei lai sminar las bunas costas finanzialas dall'Onna Maria vegnidas neu dall'America. L'Onna Maria ei denton era stada fetg enconuschenta sco buna benefactura, ella ha susteniu glieud ed instituziuns.
La vischina seniester ei la Maria Barla Schmidt-Monn (29-1-1885-6-11-1955) che ha giu maridau igl onn 1906 il Giachen Antoni Schmidt (1878-1948) da Cavorgia, calger, tgetler e cavacristallas a Sedrun, fegl da Gion Antoni (1846-1933) e Barla Catrina Benedicta Berther (1844- ). Els dus han giu 14 affons. La Barla fuva derivonta d'ina famiglia da 18 affons, la famiglia dils Tiuters da Surrein. Da quella famiglia ein sis dels emigrai ell'America e mo dus dils affons ein restai ella Val Tujetsch.
L'Onna Maria Derungs vegn si da baselgia culla Giuanna Schmidt.
La Barla han stuiu semetter ella barchetta dil motor per seschar fotografar! (Foto Thomas Schmidt, Sedrun)
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.