Ei era entuorn las quater dil suentermiezdi. La gronda part dils carschi e dils affons eran fatschentai sil funs ordeifer il vitg. Il tuccar da stuornas dalla baselgia ch'ei dedicada a sogn Balun e sontga Maria Madleina ha sussentau ils habitonts da turnar el vitg. Malgrad che la vischnaunca disponeva gia da lezzas uras d'in provediment d'aua e da hidrants, han ins mo pli saviu spindrar la baselgia, la Casalva ed in clavau che sesanflavan agl ur dil vitg. Enteifer in'ura ei igl entir vitg staus en fiug e floma. La Casalva era curclada cun in tetg da plattas, ferton che las ulteriuras casas havevan tetgs da slondas che han purschiu bien nutriment per las flomas. Totalmein ein quater casas dublas, 11 casas d'ina famiglia, 26 clavaus, 6 luvratoris, in pistregn, dus fuorns e 6 ualers daventai unfrenda dallas flomas. La populaziun dumbrava lu 60 habitonts ch'ein daventai dad in di sin l'auter senza tetg. Ina gronda catastrofa en in temps ch'ei deva aunc negina assiccuranza da baghetgs.

In'impressiun ord la Gasetta Romontscha dils 2-8-1900:

"Tiel barschament a Tersnaus han ins aunc podiu spindrar empau mobilias e victualias, ch'ina hagi giu transportau en baselgia. Ina paupra giuvna mumma seseva cun ses tschun affons pigns sillas ruinas dil barschament e bargieva; avon entginas jamnas havev'ella piars siu mariu, il nutrider da sia greva familia, ed oz havev'in incendi priu ad ella tètg e siu entir tener casa. Pilver miseria vengonza de larmas!"

Tersnaus igl onn 2017: