Il meins da zercladur haveva ina ga 4 firaus, sco per exempel sogn Gions (ils 24) e sogn Pieder e sogn Paul (ils 29). Quels dus firaus fuvan destinai d'ir si mises a magliar groma. Roschadas, specialmein giuventetgna, prendevan art e part.

Aschi prest sco ils hosps fuvan el liug e sereparti, vegneva la tschavera offerida dils purs che havevan dau gronda breigia leutier. La groma bein tratga vegneva svidada dalla panaglia. En la fueina dasperas era ina cazzetta plein pulenta cotga en uorden che tarlischava dalla pischada cungida. Quei era la principala tratga da mises. Tut che sepustava a meisa e magliava la pulenta gustusa ord la cazzetta e la groma ord ils burtgets empleni. Ei vegneva denton festginau d'emplenir ils maguns per esser presents al concert dalla musica instrumentala che vegneva ina ga ni l'autra si Milez, per dar il rin, la scua, far la vacca tschocca e secapescha era per saltar. Tut quei haveva liug el Plaun d'Éras, in grond e bi plaun, nua che tuts, era quels d'auters mises, serimnavan.