Tujetsch. Mises da Camischolas. Legra societad!

Il meins da zercladur haveva ina ga 4 firaus, sco per exempel sogn Gions (ils 24) e sogn Pieder e sogn Paul (ils 29). Quels dus firaus fuvan destinai d'ir si mises a magliar groma. Roschadas, specialmein giuventetgna, prendevan art e part. Il meglier seregordel jeu da Milez, nua che jeu sun staus entochen 15 onns sco pastur. Cunzun da sogn Pieder e sogn Paul havevan nus buobs in grond cunfar, co sepreparar per quella glieud fina. Oravontut havevan nus da spuentar il cucu per ch'el fetschi buca la groma ascha. - Aschi prest sco ils hosps fuvan el liug e sereparti, vegneva la tschavera offerida dils purs che havevan dau gronda breigia leutier. Era havevan els schubergiau la tegia e lavau la stiva schuber e bein. La groma bein tratga vegneva svidada dalla panaglia. En la fueina dasperas era ina cazzetta plein pulenta cotga en uorden che tarlischava dalla pischada cungida. Quei era la principala tratga da mises. Tut che sepustava a meisa e magliava la pulenta gustusa ord la cazzetta e la groma ord ils burtgets empleni. Ei vegneva denton festginau d'emplenir ils maguns per esser presents al concert dalla musica instrumentala che vegneva ina ga ni l’autra si Milez, per dar il rin, la scua, far la vacca tschocca e secapescha era per saltar. Tut quei haveva liug el Plaunderas, in grond e bi plaun, nua che tuts, era quels d'auters mises, serimnavan.

L'avertura deva la musica da Sedrun. Silsuenter entscheveva la part humoristica. L'emprema scena fuva il dar il rin. Cheu stuevan ils participonts dar il maun in a l’auter e formar il rin. Lu entscheveva in ord la retscha a cuorer entuorn il rin. Vonzei deva el ina tecca ad in ni ina. Quei tal stueva empruar da puder tier l’auter e sche quei era pusseivel, turnava el en siu plaz e l’auter stueva cuntinuar, cun l’intenziun da tuccar in pli plaun che stueva lu ir entuorn il rin. Aschia cuntinuava quei giug entochen che silmeins ils biars eran stai en roda. Secapescha ch'ei deva meinsvart ina cambrola e sgulada, quei che fuva il gaudi dils aspectaturs.

ll dar la scua era in giug da saltar. Ils giuvens e las giuvnas formavan «perlis». Quei giuven che veva buca ina matta, stueva secuntentar dalla scua. El sespruava da dar ella vinavon, aschispert sco pusseivel ad in cumpogn per saver saltar cun la matta da lez, pertgei cura che la musica calava, stueva quel cun la scua salvar ella ed astgava buca saltar pli. Era la giuvna che veva buca saltunz, stueva far il medem. Aschia restava il davos mo in «perli» che survegneva lu in premi.

Cudisch da Tujetsch 1986