A chatscha in Val S-charl: a schnestra Roger Staub chi gniva a chatscha aint in S-charl, insembel cun Valentin Bischoff, ed ün Roth dal Partens, intuorn il 1970.

Roger Staub, nat in lügl dal 1936 ad Arosa, d'eira ün giovader da hockey fich talentà - ed ün dals meglders skiunzs da seis temp. Als gös olimpics d'inviern dal 1956 a Cortina d'Ampezzo es el gnü quart illa cuors'aval. Als champiunadis mundials da skis dal 1956 a Bad Gastein ha el guadagnà argient illa cuors'aval, bruonz pro'l slalom gigant e bruonz illa cumbinaziun. Ün on da success es stat il 1957: là es el gnü seguond pro la cuorsa dal Lauberhorn - e sco attachant dal l'EHC Arosa es el gnü champiun svizzer! Puchà pel hockey, bun pel sport da skis, cha Staub s'ha decis pel sport da skis. Uschè ha'l danovamaing persvas dal 1959 al Lauberhorn, cura ch'el es gnü seguond illa cumbinaziun e terz illa cuors'aval e'l slalom. Il punct culminant es lura stat dal 1960, cur ch'el es gnü champiun olimpic i'l slalom gigant als gös olimpics a Squaw Valley. Staub vaiva be 25 ons, cur ch'el s'ha retrat dal sport activ da skis. Spectaculara sco sia vita es eir statta la fin da la vita: Roger Staub es crodà dürant ün svoul cul delta d'üna autezza da 150 meters ed es mort ün di avant seis 38avel anniversari, ch'el vess festivà als 1. da lügl 1974.