Gisep Heinrich è stà il prüm magister da skis dal Prinzi Charles, hoz Rai da la Gronda Britannia.

La novità as derasa sco’l füm in tuot il muond. Cha’l Prinzi Charles s’haja pudü salvar be pel nair da l’ungla da la mort in lavina. Cha ün bun ami da la chasa rojala invezza, Major Lindsay, saja gnü sdrappà da las naiveras e saja stat mort sül lö. Capitada es la disgrazcha als 9 da marz dal 1988 a Clostra. Da cuolpa e na cuolpa s’han occupadas las medias e las instanzas giuridicas amo lönch davo. Ed eir la dumonda, che uman cha’l successur sül trun da la Gronda Britannia saja insomma, ha dat dachefar a las medias. Pro mai, Ernst Denoth, chi vaiva quel di emischiun al radio rumantsch, haja fat clic: Cha Gisep Heinrich da Ramosch, da tuots nomnà Sepin, savess sgüra da quintar bler dal Prinzi, perche el es stat quel chi ha muossà al giuven Charles ad ir culs skis via Tarasp, dal 1963. Ün telefon ha bastü e pac plü tard es ida tras l’ajer l’intervista per lingia tanter Gisep Heinrich al studio dad RTR a Scuol e mai al studio a Cuoira. Blera glieud da la regiun ha dumandà plü tard adüna darcheu schi nu füss pussibel dad avair üna copcha da quell’intervista. Quella deira però ida tanter plattas chodas aint il archiv dad RTR.

D’incuort es gnü Cristian Gottschalk a savair ch'al figl da Gisep Heinrich, Jon Martin Heinrich vaiva per furtüna üna cassetta da l'intervista dal 1988 cun seis bap. Uschè esa stat pussibel da reconstruir quist documaint prezius chi deira i a perder. Als uffants da Gisep Heinrich chi han miss a disposiziun l'intervista e las fotografias ed artichels da diversas gazettas dschaina grazcha fich. Ün grond grazcha fich merita eir Cristian Gottschalk, anteriur operatur da tun dad RTR, chi ha copchà e digitalisà quist documaint e til ha miss sülla pagina da nossa istorgia.

Ernst Denoth

Sur quista adressa vais la pussibiltà da vair üna Diashow cun üna collecziun da fotografias chi sun gnü fattas dürant quel temp a Tarasp o eir sü Motta Naluns
nossaistorgia.ch/entries/0xoMa...