Stai si, scarvon Gion Paul

Stai si, scarvon Gion Paul, stai si!

Las vaccas van sul Segnas vi.

Stei si, vus umens tuts de Flem.

Udis vus buc miu clom e schem?

Ils Glarunes ein dai sul fil,

Ils gronds ladruns en in liung til,

E van cul muvel tgei ch’i pon.

E tia Nera, scarvon Gion,

Da Cunclas giu va ordavon.

Stai si, scarvon Gion, stei si vus purs,

Persequitei ils rubadurs!

Tut la fumegli’han els mazzau,

En la caldera sbuglientau.

El stgir tschaler sun staus zuppaus

E sun persuls dad els mitschaus.

Stai si, Gion Paul de Flem, stai si!

Las vaccas van sul Segnas vi…

Aschia clom’il paster ditg,

Stond orasum il grep sul vitg.

E tras la val va siu avis.

Suls cuolms entscheiv’ei a far dis.

El cloma senza paus trasor.

Lu croda el. Schluppaus ei’l cor.

Sur l’aulta preit-crap cuor’il saung.

Ti vesas oz treis sdremas aunc…

Mo giu el vitg tucc’ei de stuorn,

Ed umens van en furi’entuorn.

Sil plaz cumin sei grond scumbegl,

E spert sco mai vegn fatg cussegl.

Cun halumbards e cun spaduns.

Armai van els cun sbargatuns

Dals cuolms viasi e sur il pass.

Els vesan ils ladruns giu bass

Spel vitg cul muvel engulau.

Quel han’i en in claus serrau.

Ed en l’ustria gust’il vin,

Ed eivers ei prest finadin…

E sc’ina bisch’en dus fiats

Ein quels de Flem er gia sil plaz.

E spert il muvel lain els luc.

Mo la platiala ad in buc

Han els mess si, igl ei in grond,

Ch’ils Glarunes a scadenond

Aunc audien en lur bi curtgin,

Ferton ch’els lain plascher il vin.

Cun lur muagl da Cunclas si

Ein quels de Flem lu puspei i.

Els vegnan pér da notg e tard

Sul cuolm e vi da l’autra vart…

da Gian Fontana

Fontauna: “Miu cudesch de quarta classa”, Edius dal Cussegl pign, Mustér, 1944