Co il miedi ha curau Gionin

da Plasch Dermont / M. Lienert

Fontauna: Per vias e sendas. Cudisch da leger per las scolas primaras sursilvanas 5avel onn, Cuera, Administraziun cantunala per mieds d’instrucziun, 1965:233-234

Gionin ei in buob sco aunc biars auters da siu pèr. La sera vul el mai ir a letg, e la damaun durmess el pli ditg e pli bugen. Sch’il sulegl carsina sia fatscha, sevolva el encunter la preit e lai dar l’aura pils larischs. Pertgei pomai er ir a scola e studegiar ch’il tgau beinduras dola? Quei ei tuttavia buca necessari.

Ils Talianers che vegnan cheu tier nus san per part era nudar lur num mo cun ina crusch e gudognan tuttina bia sco nos luvrers. Quels patratgs occupeschan oz Gionin. Cuninagada eis el seresolvius da schar far la scola peiver e da ruassar e smarschanar vinavon.

Cheu splunta la mumma, ed il buobet semeina sin tschei maun. «Gionin, ti stos segir festginar e vegnir ord letg!» Gia sestorscha il schani sin tuts mauns e lai crer sia buna mumma ch’el seigi malsauns. Tgei fetgas e temas per siu fegliet! En prescha arva la mumma ils barcuns dalla combra e stai, tgei surpresa! Il miedi va gest sper cas’ora.

«Signur miedi, nies Gion ei buc bein vidlunder. Vus pudesses visitar nies pauper mat.» Il miedi stat cuninagada avon il letg. Mo, mo febra ha el buc, quei ei il bia buca bunas enzennas. El interquera e viseta il scolar manedel e bein. Nies versau e capavel miedi encorscha cuninagada la malsogna dil smarschun. El sevolva tier la mumma e di: «Per quella gada sto el probabel aunc buc murir, mo curaus sto el vegnir. El ha memia bia saung che cuora en sias aveinas e quei savess esser cul temps prigulus.

Jeu vi beindabot ira vi casa per las sanguettas. Quels tschetschasaung mettein nus davos las ureglias ad el. Igl ei bein dolorus, mo ei dat buc auters mieds per curar quella malsogna.»

Il miedi banduna la combra. La mumma ei spir fetgas e temas per siu malsaun. Nies Gionin siua ussa dalla tema. Tgei stoda filiberga. Tscha, cheu lai ei buc spitgar pli ditg. La mumma ei en cuschina. In sprun ord letg, en cun caultschas e camischa, il turnister si dies e beinbufatg giu e dad esch ora. Gia camina el tut en in fem encunter la scola...