L'anflada dalla veta
L'anflada dalla veta
Ensemen cun in amitg anfla il cavacristallas da Fuorn Giusep Venzin gl'onn 1958 quater exemplars tut specials: in quarz da fem da 45 ed in da 47 centimeters lunghezia van en possess da Venzin. Anflau han els las cristallas entadem la Val Cristallina, pli exact silla Bianca.
Pli tard scheva Giusep Venzin: "La Bianca ei mia amitga".
Ils dus quarz da Venzin vegnan vendi igl atun 2023 al Museum dalla natira dil Grischun.
Rapport en La Quotidiana dils 18 d'october 2023:
Ils bials da La Bianca
Il Museum dalla natira dil Grischun a Cuera ei per duas grondas attracziuns pli rehs. La fundaziun ch’ei en possess dallas collecziuns dil museum ha numnadamein saviu cumprar dus bellezia clutgers da quarz da fem anflai igl onn 1958 el territori da La Bianca entadem la Val Cristallina en Val Medel. Als cavacristallas Giusep Venzin da Fuorns e Werner Burger era ei reussiu da scuvierer
in fuorn e da quel ein denter quater clutgers cun lunghezias da mintgamai rodund in miez meter vegni alla glisch. Ils dus clutgers ch’ein vegni cumprai dalla Fundaziun collecziun Museum dalla natira dil Grischun eran en possess dalla famiglia dil cavacristallas Giusep Venzin-Bearth ch’ei morts igl onn 2020.
La Fundaziun collecziun Museum dalla natira dil Grischun ha saviu acquistar per radund 70 melli francs dus gronds clutgers da quarz da fem dalla famiglia da GiusepVenzin-Bearth da Fuorns permiert. «Igl ei stau il giavisch da Giusep Venzin che quels dus clutgers restien el Grischun e ch’els daventien accessibels alla publicitad», di Ueli Eggenberger, responsabel per la collecziun da minerals dil museum. El ha enconuschiu fetg bein il cavacristallas ch’ei naschius 1931 e morts 2020.
Clutgers da La Bianca - la gronda anflada
Ord vesta dalla mineralogia ei il datum dils 25 da settember 1958 probablamein in dils pli impurtonts ella historia dalla vischnaunca da Medel. Lu han Giusep Venzin e Werner Burger aviert in fuorn sut il péz da La Bianca sin rodund 2900 meters sur mar entadem la Val Cristallina. Reussiu ei quei ella preit encunter nord e quei grazia al glatscher ch’era lu bia pli ad ault. Da quei fuorn han els saviu prender in tschuppel quarz da fem. Denter quels era quater cun ina grondezia da mintgamai rodund in miez meter. «Els eran intacts, da bellezia colur e per quella grondezia fetg clars e transparents», constatescha Ueli Eggenberger. Dus da quelsclutgers ein vegni en possess da Giusep Venzin, tschels dus dil collega Werner Burger.
Cun occasiun d’ina fiasta dil vitg a Curaglia la fin dils onns 1960 ein ils dus magnifics clutgers vegnir presentai l’emprema ga alla publicitad. Damai che Giusep Venzin haveva il giavisch che ses dus clutgers restien el Grischun, ei la Fundaziun collecziun Museum dalla natira dil Grischun s’interessada da saver cumprar ils dus clutgers. Ussa ein els da veser el museum a Cuera. In cun 47 cm e 13,7 kg, l’auter cun 45 cm e 12,6 kg. Tenor il directur dil museum Ueli Rehsteiner ha la fundaziun pagau per quels dus unicats 70 000 francs. En in artechel ella «Mineralien-Welt» igl onn 2012 vegnan ils dus quarzs taxai sco «super-scoperta».
Nossa vita: in tschientenari istorgia svizra en maletgs
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.