Casa da Teofil Schmid-Venzin, Sedrun

Al Forum cultural Tujetsch ha la famiglia regalau tut sias fotografias ch'el ha fatg ils onns 1930/40/50 e 1960, en tut varga 3000. Igl ei ina documentaziun fotografica d'impurtonts onns da svilup ella Val Tujetsch. Biaras da sias fotografias ein ussa presentadas silla plattafuorma "nossaistorgia.ch".

****Teofil Schmid ei naschius ils 7 da zercladur 1912 a Zarcuns el ravugl d'ina gronda famiglia purila. Teofil frequenta las scolas da vischnaunca e fa silsuenter duront quater onns la scolaziun da graficher a Friburg.

Dasperas absolva el aunc il diplom da scolast da dessegn. Il temps era buca favoreivels e nunanflond plazza retuorna el a Sedrun ed arva ina fatschenta d'artechels da sport, fotos e souvenirs. Ulteriuramein s'occupescha el sco fotograf e sias fotografias dattan perdetga da siu senn e dun artistic. Sia fatschenta, ligiada cul turissem, motivescha el da s'engaschar sin quei intschess. Specials merets ha el per la Scola da skis ch'el ha menau plirs onns. Sia clamada da graficher ha el mai praticau per propi. In mussament da siu dun artistic ein sias illustraziuns dil Tschespet 36 da Vic Hendry. Persuenter ha el duvrau sia secunda clamada e daventaus magister da dessegn ella scola professiunala a Cumpadials e quei duront 35 onns.

Il Teofil ei era s'engaschaus cun sias forzas per la publicitad. Da 1941-1957 eis el staus ella suprastonza communala. La cassa da cumpensaziun ha el administrau entochen 1971. Sin palancau politic eis el era staus activs ord la val. Da 1951- 1953 eis el deputau dalla Cadi. Igl onn 1953 marida el la Sofia Venzin (1920-2005) da Selva. Els han treis affons, dus buobs ed ina buoba.

Suenter ina strentga sesiun da stad serenda el per serecuvrar el spital a Glion. Mo quei ei stau sia davosa staziun. Ad ina attacca dil cor ha el buca pudiu resister. El miera ils 26 da settember 1973.