Il temp dad hoz va via fich svelt. Tuot capita in gronda prescha. Il svilup da la tecnica e dals mezs da comunicaziun es impreschiunant. Nus gnin innondats mincha di cun novitats da tuot gener e nan da tuot las varts dal muond.

Quai chi'd es capità her, es hoz fingià passà e miss d'vart. L'uman invlida fich svelt. Perfin evenimaints chi han occupà e commoss üna jada ad üna populaziun intera, sun its svelt in invlidanza. Quai es il cas eir pro la gronda catastrofa da lavinas da l'inviern 1951.

Chi as regorda e discuorra amo da quels dis suls e da temma d'avant passa ün mez tschientiner? La generaziun giuvna in mincha cas nu sa nüglia da quai. I's sto ir pro glieud veglia, schi's voul surgnir infuormaziuns autenticas. In singulas chasas as chatta amo alch fotografias o descripziuns dals dons da lavinas in Val Müstair. E cun sfögliar aint illas gazettas o i'ls archivs da quel temp, as poja leger amo singuls rapports in quel connex.

Il Pass dal Fuorn es stat intransibel dürant ün mais. La posta e mangiativas gnivan transportadas cun aviuns fin in Val. Tanter Sta. Maria e Sielva crodaivan ils parasagls per terra e gnivan lura manats o portats dal postin fin in cumün.