Far ora ieli en casa mulin a Gonda

Battesta Soliva-Cavegn (1882-1957), Maria Catrina Elisabeth Monn-Venzin (1890-1955) ed enamiez Maria Venzin (1891-1974).

ll far o ieli

Ina dallas pli impurtontas ed interessantas lavurs ei senza dubi il far o ieli. A Sedrun anfl''ins quei indrez ella casa Mulin. La procedura ei ualti cumplicada. In per famiglias Semettan ensemen e segidan. Avon miezdi brassan las masseras il sem-glin e silsuenter vegn quel smaccaus dallas pélas entochen ch'ei dat ina frina fina. Suenter miezdi fan ellas la pasta sem-glin. Quella ston ins allura schar scher in per uras. Encunter sera vegn quella pasta aunc smaccada inaga dallas pelas entochen ch'ella ei loma e fina.

La sera serimnan ina entira partida persunas els locals da far o ieli, giuvens e vegls, umens e femnas. Ei drova in pulit diember da gidonters. Ei maunca denton era buca aspectaturs e ménders.

La pasta fina vegn svidada en in parlet e barsada entochen ch'ella ei buglienta. Quella vegn silsuenter svidada en ina blaha da glin. Da leu portan ils gidonters quella mixtura grassa tiel torchel. Ussa san ils umens schar o cups. Cun tutta forza meinan els entuorn igl ischel dalla pressa e stroclan ora igl ieli, che cola en in zeiver ni en ina sadiala. Ina curtauna emplenida cun pasta sem-glin dat in miez liter ieli. Quel vegn duvraus per cuschinar certas tratgas, per part mischedaus cun auter grass, magari era sco medischina. La pasta struclada ora che resta anavos numn'ins paun d'jeli. Quel vegn applicaus per engarschar ils animals.

Il proprietari dalla stanza e digl indrez da far o ieli vegn indemnisaus cun in pign procent dalla raccolta, p. ex. sin 12 pauns d'ieli, igl ieli d'in paun ed in entochen dus pauns d'ieli.

Suenter la lavur finala dat ei adina in oreifer puschegn ed ei vegn fatg empau fiasta e sch'ei regia propi buna luna perfin sunau, cantau e saltau. Sco gia menziunau, ultra dils commembers da famiglia maunca ei era buca visetas beinvegnidas ni magari era nunspetgadas.