"Il Romontsch", la gasetta conservativa, rapporta en nr. 15 digl onn 1848:

"Sin Cadruvi a Sedrun duei vegnir baghegiau in stupent casament per las scolas da Sedrun. Per treis autras casas da scola, eis ei schon ussa lenna sil plaz. Tujetsch sestauscha pia cun honur vinavon."

Scola Cadruvi

Damai ch'ins vegn buca perina dad ereger ina casa da scola centrala a Dulezi, sco quei che las instanzas da cumin e la cumissiun da scola vevan intimau, prendan ins en mira da baghegiar la scola, ensemen cun la casa pil caplon, sin Cadruvi da Sedrun. Il grond impediment per la varianta centrala ein ils vischins da Camischolas e Zarcuns stai. Da capir eis ei ch'ils da Cavorgia, muort la distanza, han sez vuliu la scola egl uclaun.

Quels dus plans han tunschiu al scrinari Gion Benedetg Deragisch.

Il contract cul scrinari:

Accort

Ei daventau in contract, denter la cumissiun da scola e meister signur sechelmeister de Ragisch. Il detg sechelmeister de Ragisch interpren da baghegiar si la casa da scola e caplon cheu a Sedrun tenor "Abreiss". La altezia dils cumahs dalla emprema alzada dueigien restar. L'altezia denter ils plantschius tredisch quartas e mesa, la secunda alzada dueigi ver e restar l'altezia da bein dudisch quartas. El giebel l'altezia dallas combras sco ei po en. Ei dueigi vegniu mess si isiarchels a canals e tablegiau las grundas sut si con aissas per "Schirm dil Luft", sco era encunter las lattas dueigi vegnir tablegiau cun aissas. Igl "Überschuss" dueigi vegnir fatgs ch'in sappi metter si ....latten.

Per la sura lavur paga la cumissiun al detg meister in capital da 320 flurins, treitschien e vegn rischuldis e vegn ......, il qual capital dueigi vegnir pagau duas tiarzas sin datun proxim, ed ina tiarza dueigi vegniu dau empau peda, sche la cumissiun fuss buca el cass da saver pagar tut. Il meister ei obligaus da far la lavur sco ei auda.

Tujetsch ils 3 de Avrell 1848

Joseph Ant. Durgiai Farrer

Johan Jacob Beer, Actuar

Gionbenedeig de Ragisch