Als 13 da mai dal 1928 ha gnü lö illa Bos-chetta tanter Sta. Maria e Valchava la „Festa d’uffants da tuot la Val Müstair“. Illa gazetta Fögl d’Engiadina esi gnü rapportà detagliadamaing da quel evenimaint chi ha reuni la scolaresca da tuot la Val Müstair as divertir cumünaivelmaing. Laschain seguir ün pêr passadas da la contribuziun:

„Eir per la festa d’infants stovettan spettar fin sün dumengia, 13 Mai, per avair bell’ora, ma l’ora nun füt neir in quaist di dal tuot favuraivla, il sulaj as zuppantet d’incuntin davo las nüvlas grischas e gnanc’üna bell’uonda d’el nun vulet derasar glüsch e splendur sur la giuvenila società.Quaista nun as laschet però tour seis bun umor. Infants e giuventüna sun adüna allegers e cuntaints; be ch’els possan sbalzar nel liber e’s divertir in cumpagnia, schi nun tscherchan oter. Que füt üna prüvada e bella festa, lö propizi, situà propi a mez la val, stupends larschs intuorn ed intuorn… Que gnit chantà da pitschens e grands, chi eir ün gust da tadlar. Durant las possas sunet la nouv resüstada musica instrumentala da Sta. Maria cun agüd da varsaquants musicants dals aters cumüns da canderaint – sco cha nus dschain. Eir la musica da Müstair accompagnet il cortegi dallas scoulas da Müstair sün plazza festala e sunet differents töchs, cortegiand la cumpagnia... Alchünas mattas, costümadas cun schic, prodüettan durant la festa ün rudè (rinch), fosamaing clamà „Reigen“, ma il nom non fa inguotta a la chosa… Circa a mez l’act festal discurrit srr. Rev. Filli in classica lingua rumauntscha davart scopo da festas in general, ed in spezial davart scopo da festas d’infants per nossa intera Val Müstair, el mosset cha l’uniun fetscha la forza e cha avains pustüt in Val Müstair bsögn d’esser unids, siand da chas’oura fich isolads… Insomma, que füt adonta da l’ora pac conveniainta üna bella festa, cun varià program, e nun dessan darcheu passar 22 ans, ant co chi vegna ün’atra, perche la prüma festa d’infants avaiva chattà lö avant 22 ans giò suot Sta. Maria, nel uschedit Plaunschunpeder (Plaun da junkar Peder?). Avant co finir stovain auncha citar alchüns versets miss nels archs al ingress dals lös principals da passagi. Avant l’entrada dal cumün da Valchava eira ün arch chi portaiva la seguainta inscripziu:

Hoz, infants, ais di da festa,
di d’elgrezcha ed allegria,
Hoz nun causa rumpatesta
ruots, istoria, geografia.

Al ingress da la plazza festala eira da leger in grand e bel arch:

Per nossa festetta da cour ün bainvgnand!
Cha tuot as diverta, il pitschen e’l grand.

In tuot e dapertuot eira la festa bain organisada e preparada e’l numerus public accurri da tuottas varts füt d’unanima cuntaintezza ed arcognuschentscha, e nus conclüdain cun l’inscripziun missa al sortir dal portal festal:

A fin ais la leidezza, cumgià stovain nus tour!
E pür per plü algrezia avessan lö nel cour.