La notg dils 11 da zercladur 1949 ei stada per Selva la notg dalla terribla disgrazia. Circa in quart avon las diesch sededesta Paul Benedetg Venzin (1914-1978), in um che mava baul a letg, mo fuva era marvegls la damaun, che las flommas vegnend ord il clavau sut sia casa nova stada da siu quinau Augustin Venzin, ius el Tessin, dattan sper las finiastras si. El sa mo spert dar alarm e prender ils affons ord letg, in mo da treis meins, ed empau resti ed ira cun dunna ed affons vi Surrein/Selva. Remarcabel che negin veva viu ad uras in aschi grond fiug. In mat, Monn da Sedrun, era pauc avon vegnius el vitg a mattauns, feglias da Sep Lurenz Venzin (1889-1975), e veva aunc engartau nuot. Ils umens ein spert sigli vid ils hidrants. Denton deva la Curnera ed il hidrant entadem ei prest staus circumdaus da fiug. Els vegnan buca da metter en funcziun, ch'il bischel peglia fiug ed ei ston fugir e schar tut agradgiu. Il fiug fa segls d'in baghetg a l'auter, tut ei gie vit e seccau ora. Ins emprova da metter en funcziun il secund hidrant sut casa pervenda, mo igl ei memia tard. Aschia ein ils hidrants mess neu 1926 cun grond cuost, stai da pauc gudogn. Ins sto fugir per mitschar cun la veta. Odem il vitg pon ins aunc dustar enqual caussa. Sur Schuler po spindrar il Sontgissim ed ina statua veglia da Nossadunna, mo sto schar barschar tut siu uorden en casa. Ils Sep Lurenz Venzin sisum il vitg han aunc pudiu dustar dabia uorden. Enagiudem il vitg ei iu da cletg che la glieud han pudiu mitschar. Leu ei barschau pli che vegn tiers manedels, ils tiers gronds veva ins vi Surrein ni sin Tschanmut. Denton arriva il succuors da Sedrun e Rueras cun lur sprezzas, ed era bein gleiti la sprezza da motor da purtar dalla Fort-Wache en auto neu d'Ursera. Il telefon a Selva ei prest staus sclaus ed ins ha telefonau da Tschamut anora per agid. A Sedrun e Rueras ha il Gaudenz Loretz (1921-1972), che ha sez in jeep, clamau ed ils autos han spert spediu viaden umens ed iseglia. A Rueras ha ei curnau in tec avon las diesch, da tuccar ils zenns han ins emblidau. Cuntinuaziun mira: Il barschament da Selva da Gion Anroni Venzin

Dapli sur dil sgarscheivel barschament da Selva: Il barschament da Selva