Tujetsch, ils 2 da november 1862

Car frar,

....... Il davos di vai jeu buiu brav aua. L'auter di fageva ei empau mal igl tgau. Jeu sundel ius ad alp si Tiarms. Igl tgau ha fatg pli e pli mal. L'auter di sundel jeu vegnius a casa, ius enta letg e suau brav. Vida mesa notg ha ei entschiet a far mal il pèz e serrar ch’jeu pudevel strusch trer flad. Quei ha cuzzau duas uras. La damaun, ch’era ina sonda, ha ei fatg il semgliont. Quei di sun jeu staus "schuahs". La sera vida las nov ha ei fatg puspei il medem. La dumengia (quei ei stau 8 dis suenter quei che jeu vevel scret tia brev) erel jeu ualti taffers. Sundel levaus e suenter viaspras ha ei turnau ad entscheiver. Nus vein lura fatg vegnir e surlischar (Aderlass). Schigleiti sco il saung ha giu "luvt", sche vai jeu sentiu negin mal pli. Gliendisdis sun jeu levaus bein marvegl. Il mardis han ei schau ir a cuolm ed jeu stevel vess a casa. La gievgia sundel jeu era ius si Londadusa e vai luvrau brav tschun sis dis. L'autra gievgia vai jeu stuiu star enta letg. L'auter di vein nus tschintschau cul docter. Quel ha dau in burgaz (Abführmittel) e sch'ei vegni buca meglier sche stoppi jeu turnar a far surlischar. Il burgaz ha burgau pauc, ha catschau si el tgau ch’jeu savevel muentar nuot la pial dalla fatscha. La Naschientscha vein nus puspei fatg surlischar, mo lezza gada eisi stau tuttina. Treis, quater dis ha ei fatg mal il tgau sgarscheivel. Il docter ha lu dau in visicatur (Zugpflaster). Quel ha tratg brav il mal ed ha lu calau. Mo la pial dalla fatscha ha dau ditg da vegnir meglier. Pli che 15 dis vai jeu buca saviu tschintschar scoiauda. Jeu vevel negin mal, mo jeu erel vegnius schi "schuahs" ch’jeu pudevel strusch ira per la stiva entuorn. Igl ei vargau pli che tschun jamnas avon ch’jeu possi luvrar. Gl'emprem cu jeu vai fatg zatgei, vai jeu scudiu, pudevel aber buca dar ton stagn. Gl'ei aber vegniu trasora meglier. Ei maunca aunc empau possa, gl'auter sun jeu ussa schi sauns sco avon.