Aschi spert sco il glin ei sburlaus s'occupescha la massera immediat cun las borlas. Quellas ein aunc serradas e plein paglia e miardas. Igl emprem tucca ei da schubergiar ellas, silmeins il pli da gries. Leutier survescha il von grond e pli tard il mulin da vanar.

En in liug empau schurmegiau e sulegliv rasa la massera ina partida blahs senza cantuns sils quals ella svida las borlas. Cun in rist da lenn reparta ella quellas ulivamein per ch' ellas sechien e sesarvien ella calira dil sulegl atunil. Savens aud 'ins in lev schluppegiar, tuttavia sch'igl ei in di propi cauld. Per ch'il suffel porti buca naven la raccolta vegnan ils cantuns dils pons fermai cun crappa ni magari cun ina stagia.

Encunter sera serenda la pura sil prau. Cun in dratg da flucs grond e pli tard cun in pli pign tgira ella las borlas. Entras scurlar e zaccuder croda il sem glin atras las maschas. Duront la notg mett'ins borlas e sem glin en sut. Quella lavur serepeta mintgadi entochen che tut las borlas ein saviartas ed il sem - glin separaus. Las borlas drov'ins da stiarner en nuegl.

Duront onns da fomaz (1622 e 1817) vegnevan las borlas muladas e mischedadas cun la frina da far paun.

Il sem glin sto esser schubers e secs, perquei vegn el aunc inagada tgiraus cul dratg da semglin e secchentaus el sulegl e sin pegna.

(text da Teofil Schmid-Valier en La Tuatschina)

Clementina Beer-Schmid (1870-1949) vegn cun in pentel borlas.

Ella rasa ora las borlas da semglin.