Ursula Tschuor

Burgheisa da Rueun. Carschida si a Sagogn. Fatg il seminari ad Ingenbohl. Dau scola primara a Himmelried SO, Surcuolm, Egolzwil Lu e 32 onns a Schötz Lu.

Tge fascinescha Vus vid la pagina nossaistorgia.ch?
Mei interessescha pli e pli fetg la veta da mes perdavons. Per cletg ha mia sora rimnau gia baul fotografias, brevs e gasettas cun interessants artechels sur dil viver da nos perdavons. Ella mava era en bibliotecas dil stadi per encurir documents. Miu bab ha cun sia sempla camera adina puspei fatg fotos da nossa famiglia. Oz sundel leda sur da quels documents. Las fotos raquintan bia sur dalla veta en famiglia. Dalla sempladad mo era co nus eran cuntents cun pauc. Nus vevan in l’auter e quei era bia.

Pertgei publitgais Vus documents sin nossaistorgia.ch?

Ord quels motivs publicheschel jeu fotos ed artechels sin «nossaistorgia.ch» Buca mo jeu, era ils auters han interess dil viver da nos perdavons. Specialmein fotos cun persunas ord il vitg vegnan miradas fetg savens. Persunas vid la lavur, participonts a fiastas da cant ni da musica interesseschan la glieud. Brevs da nos emigrants, per exempel ell’America, raquentan sur da lur quitaus, il schar encrescher mo era da lur plaschers en tiara jastra.

Co pudess ins motivar autra glieud da publitgar documents dal Grischun sin nossaistorgia.ch?

Jeu manegiel ch’ins duess adina puspei far referats cun films, fotografias etc. ord la pagina e forsa era cun in cuors per glieud pensiunada co publicar fotografias sin nossaistorgia.ch. Plinavon animar enconuschents da metter si fotografias ni artechels en „nossaIstorgia.ch“.