Ciprian Giger

Vieus, staus maridaus 25 onns cun Carin Manetsch, oriunda da Mustér. 2 affons in buob ed ina buoba. Habiteschel a Pardé. Empriu mecanist d'autos e silsuenter sescolaus vinavon sco diagnosticher d'automobils diplomau. Dapi entgins onns lavurel sco mecanist tier l'armada Svizzra en la regiun dil Lucmagn.

Intervesta stad 2020 cun Ciprian Giger da Pardé, Val Medel – commember da nossaistorgia

-Tge fascinescha Vus vid la pagina nossaistorgia.ch?
Fascinont ei la pusseivladad d’encurir bellezia fotografias veglias. Mo era films ch’ein daditg registrai ed emblidai da nossa regiun mo era digl entir cantun Grischun. Igl ei fetg intressand d’era persequitar e mirar las contribuziuns per exempel dall’Engiadina.

-Pertge publitgais Vus documents sin nossaistorgia.ch?
Cunquei ch’jeu sundel mez fetg intressaus, co ei era avon biars onns ed igl ei fascinont da contemplar quels bials maletgs da lu mo era actuals, ein forsa era autras persunas intressadas vid contemplar mias registraziuns, che pertuccan pil pli mo la Val Medel.

-Co pudess ins motivar autra glieud da publitgar documents dal Grischun sin nossaistorgia.ch?
Ei dat pli e pli biars intressai che vulan e han era la peda da contemplar, da leger contribuziuns da nos vischins. Ei fuss fetg d’engrau sche aunc dapli glieud publicassen lur scazzis (ch’ein segirafranc en fetg biars albums da fotografias el Grischun) Ina biala fotografia, sch’ella ei pil possesur aunc aschi nunspectaculara ed impurtonta, ei forsa per enzatgi auter d’immensa valeta. Quei ein scazzis che duessan buca esser mo pils possesur veseivels, mobein per l’entira publicitad. Ins savess era far reclama per persunas ch’ein buca gest colligiadas di e notg cun la reit d’internet, ch’ei dessi sustegn per publicar las fotografias. Jeu manegel en mintga vischnaunca fuss enzatgi promts per far quei e segidar. Ins stuess mo survegnir il material........

-In tip da Vus per megliurar la pagina nossaistorgia.ch:
La pagina ei fetg buna. Per mei persunalmein mauncan intec las informaziuns tier mintga fotografia. Ei duess esser scret en cuorts plaids il cuntegn e la regiun. Igl ei indicau mintgamai cun indezis il temps ed il liug. Denton la historia persunala d’ina fotografia veglia fuss per mei e ualticarteivel aunc per biars da gronda impurtonza.